Քաղաքական

01.02.2021 21:05


Դիպուկահարի կրակոցից վիրավորված զինծառայողը կորել է Հայաստան տեղափոխվելիս. հարազատները պահանջում են քրգործ հարուցել

Դիպուկահարի կրակոցից վիրավորված զինծառայողը կորել է Հայաստան տեղափոխվելիս. հարազատները պահանջում են քրգործ հարուցել

30-ամյա Սարգիս Հարտենյանը պայմանագրային զինծառայող է՝ Շիրակի մարզի Ախուրիկ գյուղից. նա անհետ կորել է Արցախյան երկրորդ պատերազմի օրերին։ Հարազատները նրա հետ վերջին անգամ խոսել են հոկտեմբերի 6-ին։

Սարգիս Հարտենյանն ամուսնացած է, ունի 2 անչափահաս որդի։

NEWS.am-ի հետ զրույցում Սարգիսի ընկերը՝ Համբարձում Խաչատրյանը, պատմեց, որ ընկերը հոկտեմբերի 6-ին զանգահարել է բոլոր ընկերներին, հարազատներին ու ասել՝ «ընտիր վիճակ է, առաջ ենք գնում»։

Սարգիսի ընկերը պատմեց, որ նա կռվել է Մատաղիսի ուղղությամբ, հոկտեմբերի 8-ին վիրավորներին իջեցնելիս հակառակորդի դիպուկահարի կրակոցից կրծքավանդակի հատվածում վիրավորում է ստացել, որից հետո այլեւս լուր չեն ունեցել ընկերոջից։

«Վանաձորի զորամասով գնացել է Աղդամ, հետո տարել են Մատաղիս, այնտեղ հոկտեմբերի 8-ին վիրավորվել է, իր ծառայակից ընկերներն առաջին օգնություն են ցուցաբերել, վիրակապել են ու տեղափոխել Մարտակերտի հոսպիտալ։ Հետո մենք ճշտել ենք, որ իր անունով անկետան բացել են, հիվանդանոցում վիրահատություն է տարել։ Նրանց ասելով պիտի տանեին Ստեփանակերտ, հետո էլ Գորիս, բայց Մարտակերտից դուրս եկան ու կորեց։ Այնտեղ գտել ենք շտապօգնության մեքենան։ Մեքենայում գտնվող անձնակազմից ասում են, որ իրենց հետ եղել է ծանր վիրավոր։ Մենք ճշտել ենք, որ երբ շտապօգնության այդ մեքենան դուրս է եկել, այդ մեքենային ճանապարհին ոչինչ չի պատահել, նորմալ գնացել են»,-պատմեց նա։

Համբարձում Խաչատրյանն ասաց, որ ընկերն արդեն մոտ 4 ամիս է՝ անհայտ հանգամանքներում անհետ կորել է, սակայն որեւէ իրավապահ մարմին այդ հարցով չի զբաղվել. «Դիմել ենք Ազգային անվտանգություն, Պաշտպանության նախարարություն, Ռազմական ոստիկանություն, Զինվորական դատախազություն, Մարդու իրավունքների պաշտպանին, ռուս խաղաղապահներին։ Գրավոր երբ դիմեցինք ԱԱԾ-ին, մեզ զանգեցին, Սարգիսի հեռախոսահամարը ուզեցին, մենք տվեցինք, հետո անցավ մի քանի օր, չկար իրենցից տեղեկություն, Սարգիսի հեռախոսահամարը ակտիվացրինք, ուզում էինք հասկանալ՝ արդյոք զբաղվո՞ւմ են այդ հարցով, զանգեր ենք կատարում այդ հեռախոսահամարով, բայց ոչ մեկն ԱԱԾ-ից չի ասում՝ այս մարդու համարը միացրած է, գուցե գտնվե՞լ է»։

Նրա պնդեց, որ այդ դեպքի առնչությամբ պետք է հարուցվի քրեական գործ. «Ուզում ենք, որ քրեական գործ հարուցվի, որովհետեւ մեր տեղեկություններով՝ Սարգիսը ողջ է եղել, անհայտ պայմաններում կորել է։ Եթե մտածենք, թե գերի է ընկել, դա այդքան էլ հավանական չի, քանի որ այդ օրերին այդքան գերի ընկնելու հավանականությունը մեծ չէր։ Անհնար է, որ հոսպիտալից գերի վերցնեին։ Հնարավոր է, որ մեր հոսպիտալներից մեկում լինի, սակայն նայել ենք բոլոր տեղերում, ապարդյուն։ Մտածում ենք՝ գուցե անգիտակից վիճակում մի տեղ լինի, գտնենք։ Եկեք վատագույնը մտածենք, եթե ողջ չէ, մահացել է, ապա մարմինն ո՞ւր է, չէ՞ որ Մատաղիսը մեր վերահսկողության տակ է։ Նրա զինակից ընկերները կան։ Նրա զինակից ընկերներից մեկը նույն տեղում երբ վիրավորվել էր, միանգամից տեղափոխել էին Երեւան»։

Այս խորագրի վերջին նյութերը