Հարձակողական ոճի կիսապաշտպան, Հայաստանի հավաքականի ավագ Հենրիխ Մխիթարյանը եղել է հռոմեական թիմի մեկնարկային կազմում և փոխարինվել 82-րդ րոպեին՝ խաղադաշտում իր տեղը զիջելով Ստեֆան Էլ Շարավիին:

Հայ ֆուտբոլիստն Իտալիայի Ա սերիայի ընթացիկ առաջնությունում մասնակցել է 22 հանդիպման (բոլոր դեպքերում՝ մեկնարկային կազմում)՝ դառնալով 9 գոլի ու 8 արդյունավետ փոխանցման հեղինակ։

«Ռոման» 23 խաղից հետո վաստակած 44 միավորով եզրափակում է աղյուսակի լավագույն եռյակը: Այնտեղ են նաև նույնքան հանդիպումներ անցկացրած «Ինտերն» (53 միավոր, 1-ին հորիզոնական) ու «Միլանը» (49 միավոր, 2-րդ տեղ):

«Բենևենտոն» 23 հանդիպումից հետո ունեցած 25 միավորով 12-15-րդ հորիզոնականներն է կիսում նույնպիսի ցուցանիշներ ունեցող «Բոլոնիայի», «Ուդինեզեի» և «Ֆիորենտինայի» հետ:

Պաուլու Ֆոնսեկայի գլխավորած թիմի համար սա ընդամենը 2-րդ ոչ-ոքին էր (նախորդը՝ «Ինտերի» հետ 17-րդ տուրի մրցավեճում՝ 2-2) առաջնությունում վերջին 13 խաղերում: «Գայլերն» այդ ընթացքում տոնել են 8 հաղթանակ, կրել 3 պարտություն:

Ֆիլիպո Ինձագիի գլխավորած թիմն Ա սերիայում իր առանց հաղթանակների շարքը հասցրել է 7-ի՝ այդ ընթացքում գրանցելով 4 ոչ-ոքի, 3 պարտություն: «Բենևենտոն» առաջնությունում վերջին անգամ հաղթել է հունվարի 6-ին, երբ 16-րդ տուրում հյուրընկալվելիս 2-1 հաշվով առավելության է հասել «Կալյարիի» նկատմամբ:

Թիմերն Ա սերիայի շրջանակում, ընդհանուր առմամբ, հանդիպել են 4 անգամ, և «Ռոման» տոնել է 3 հաղթանակ, 1 դեպքում թիմերը խաղաղությամբ են բաժանվել:

Աղբյուրը՝ vnews.am