ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի և «Հայաստան» Խմբակցության պատգամավոր Արամ Վարդևանյանի գլխավորած ընդդիմադիրների երթը մեկնարկել է «Դալմա Մոլ»-ի մոտից և շարժվում է դեպի Հաղթանակի կամուրջ:

Ոստիկանները հանգիստ ուղեկցում են նրանց: Ակցիայի մասնակիցները ոստիկաններին տեղեկացրին, որ երթը հասնելու է մինչև Ֆրանսիայի հրապարակ:

Ակցիայի մասնակիցները վանկարկում են՝ «պայքար», «միացում», ապա սկսեցին երգել «Զարթիր, լաո» երգը:

«Հրազդան» մարզադաշտի մոտ ինչ-որ պահի իրավիճակը լարվեց, հրմշտոց սկսվեց: Ցուցարարներից մեկը բղավում էր. «Ձեզ խելոք պահեք, արա»:

Ժամանեցին մեծ թվով ոստիկաններ, այդ թվում սև բերետավորներ, նրանք սկսեցիօն ուժով բերման ենթարկել ցուցարարներին: Վերջիններս վանկարկում էին՝ «Նիկոլ դավաճան»:

Ոստիկանները քաշքշելով փորձում էին բերման ենթարկել նաև Արամ Վարդևանյանին, սակայն քիչ անց բաց թողեցին: Ոստիկաններին հաջողվեց բացել ճանապարհը, երթը շարունակվեց մայթով:

Նշենք, որ այսօր վաղ առավոտից քաղաքացիները կրկին կաթվածահար են արել մայրաքաղաքի մի շարք փողոցներ:

Նախօրեին ՀՅԴ ԳՄ անդամ, ԱԺ փոխնախագահ Իշխան Սաղաթելյանը հայտարարեց, որ պայքարը պետք է մեծացնեն և ընդգրկեն ամբողջ Հայաստանը։ Նա կոչ արեց մարզերի բնակչությանը մարզերում վերսկսել բողոքի ակցիաներ և ցույցեր: