Բրազիլիայի նախագահ Ժաիր Բոլսոնարուի հազարավոր աջակիցներ, նախագահական ընտրություններում նրա պարտությունից հետո, դուրս են եկել փողոցներ՝ հայտարարելով, որ ընտրություններին տեղի են ունեցել «խարդախություններ»:

Ինչպես գրում է Daily Mail-ը, նրանք նույնիսկ բանակին միջամտելու կոչ են արել, ինչը, ըստ փորձագետների, առհասարակ քննարկման ենթակա հարց չէ:

Օրերի լռությունից հետո Բոլսոնարուն կարճ ելույթ է ունեցել, որում ո՛չ ընդունել է պարտությունը, ո՛չ էլ շնորհավորել է ընտրություններում հաղթած Լուիս Ինասիո Լուլա դա Սիլվային, թեև նրա աշխատակազմի ղեկավարը նրանից հետո բարձրացել է ամբիոն՝ ասելով, որ նախագահը թույլատրել է անցումը նոր կառավարությանը:



Դրանից հետո Բոլսոնարուի կողմնակիցները հավաքվել են Բրազիլիայի խոշոր քաղաքների ռազմական օբյեկտների առջև՝ կոչ անելով գործողություններ սկսել:

Կիրակի երկրի ընտրական իշխանությունը հայտարարել է, որ Լուլան հավաքել է ձայների գրեթե 51 տոկոսը: Բոլսոնարուի կաբինետը նախաձեռնել է անցումային գործընթաց, որի ժամանակ Լուլան կստանձնի նախագահի պաշտոնը հունվարի 1-ից:

Սան Պաուլոյում և Ռիո դե Ժանեյրոյում Բոլսոնարուի կողմնակիցները ցույցեր են անցկացրել՝ իրենց ուսերին փաթաթած Բրազիլիայի դեղին-կանաչ դրոշը և Լուլայի դեմ կարգախոսներ վանկարկելով:



Հազարավոր մարդիկ հավաքվել են նաև մայրաքաղաք Բրազիլիայում՝ վանկարկելով «քաղաքացիական դիմադրությո՛ւն»։

«Լո՛ւլա, գող, քո տեղը բանտում է»,-բղավել են ցուցարարները:



Նմանատիպ ցույցեր են անցկացվել ընդհանուր առմամբ ինը նահանգների և մայրաքաղաք Բրազիլիայի ռազմական օբյեկտների առջև, հայտնում է բրազիլական UOL առցանց մեդիա պորտալը:

Ցուցարարները նաև երրորդ օրն անընդմեջ պահպանել են ճանապարհների շրջափակումն ամբողջ երկրում:



Սան Պաուլոյում ռազմական ոստիկանությունը արցունքաբեր գազ է կիրառել՝ նահանգը երկրի կենտրոնական-արևմտյան շրջանի հետ կապող գլխավոր մայրուղու շրջափակումը բացելու համար, այն բանից հետո, երբ Գերագույն դաշնային դատարանը հրամայել է կիրառել «բոլոր անհրաժեշտ միջոցները» ճանապարհները բացելու համար։



Շրջափակումները անկարգություններ են առաջացրել ողջ երկրում։ Սան Պաուլոյի գլխավոր օդանավակայանը բողոքի ցույցերի պատճառով չեղարկել է 48 չվերթ:

Արդյունաբերության ազգային համադաշնությունը նախազգուշացրել է վառելիքի պակասի անմիջական վտանգի մասին, եթե արգելափակված ճանապարհները արագ չբացվեն:



Ենթակառուցվածքների նախարար Մարսելո Սամպայոն խնդրել էր ցուցարարներին ապաշրջափակել մայրուղիները, որպեսզի թույլ տան դեղամիջոցներ, պաշարներ և վառելիք շրջանառել:

Բոլսոնարուն իր հերթին ասել է, որ ցուցարարները չպետք է «օգտագործեն ձախերի մեթոդները, (...), որոնք խոչընդոտում են տեղաշարժի ազատությանը», բայց ավելացրել է, որ ճանապարհների արգելափակումները «ընտրական գործընթացի նկատմամբ վրդովմունքի և անարդարության զգացումի արդյունք էին»:

«Խաղաղ բողոքի ակցիաները միշտ ողջունելի են լինելու»,-ասել է նա։

Աղբյուրը՝ tert.am