Մայիսի 1-ին խոշոր պայթյուն է տեղի ունեցել Երևանի կենտրոնում։ Ժամը 19:30-ի սահմաններում ՀՀ ՆԳՆ Ոստիկանության Պարեկային ծառայության Երևան քաղաքի գնդում օպերատիվ տեղեկություն է ստացվել, որ Սարյան փողոցում՝ Մարտիրոս Սարյանի տուն-թանգարան դիմաց, ավտոմեքենայի գազաբալոն է պայթել։ Այս մասին հայտնում է Shamshyan.com-ը։

Օպերատիվորեն ժամանել է Երևանի հրշեջ-փրկարարական ջոկատներից 3 մարտական հաշվարկ։

Երթևեկությունը Սարյան փողոցի մոտ 800 մետր հատվածում դադարեցվել է։

«Opel Combo» մակնիշի ավտոմեքենայի գազաբալոնի պայթյունի հետևանքով վնասվել են մի քանի ավտոմեքենաներ, այդ թվում՝ «Porsche Cayenne», «BMW X5», «Toyota Camry», մեկ այլ էլեկտրական ավտոմեքենա և ևս 2-ը, որոնց մակնիշները պարզվում են։

Ըստ նախնական տեղեկությունների՝ պայթյունի հետևանքով 1 հոգի տեղափոխվել է հիվանդանոց:

Տեղում պարզվել է, որ պայթյունը ավտոմեքենայի գազաբալոնից է, գազաբալոնների մեկն ամբողջությամբ, ժողովրդի լեզվով ասած՝ «բացվել» է, 2-ն էլ շպրտվել են դուրս։