Կենդանապաշտպան ՀԿ-ների անդամները և կենդանասերները բողոքի ակցիա-երթ են իրականացնում։ Նրանք պահանջում են փոխել «Կենդանիների նկատմամբ պատասխանատու վերաբերմունքի մասին» օրենքի նախագծի խնդրահարույց կետերը՝ համոզված լինելով, որ դրանք հետագայում առաջացնելու են լուրջ խնդիրներ:

Նրանց հայտարարությունում մասնավորապես ասվում է․

«Օրինագծում չկան հստակ և միանշանակ ձևակերպումներ, ինչը հնարավորություն է տալիս կամայական կիրառման։

Ստերջացումը (ԲՍՊՎ ծրագիր) ամրագրված չէ որպես միակ մարդասիրական միջոց կենդանիների թվաքանակի կարգավորման համար։

Չկա հանրային վերահսկողություն,համայնքները և ՀՈԱԿ-ը թողնված են առանց թափանցիկության։

Տուգանքները և վարչական ճնշումները կարող են լինել անհամաչափ և վտանգավոր։

Մասնագետների և ՀԿ-ների կարծիքները անտեսվել են, լսումները եղել են ձևական։

ՄԵՐ ՊԱՀԱՆՋՆԵՐԸ

Օրինագծի լիարժեք վերամշակում՝ մասնագետների մասնակցությամբ։

Հստակ իրավական ձևակերպումներ, առանց երկիմաստության։

ԲՍՊՎ-ի պարտադիր ամրագրում։

Հանրային վերահսկողության գործուն համակարգ։

Կացարանների և խնամողների պաշտպանություն, ոչ թե ճնշում»։