Մենք պատասխանատվությունից չենք խուսափում: Ակնկալում ենք ժողովրդի վստահության քվեն: Պատրաստ ենք վերցնել իշխանական բեռը, կերտել բոլորիս երազանքների Հայաստանը: Մեզ և մեր ժողովրդին ուժ, եռանդ, վճռականություն և հաղթանակ ենք մաղթում:

Կոչ ենք անում Հայաստանի քաղաքացուն՝ Միացի՛ր, որ փոխենք:

Հ.Գ. Իմ ելույթը «Առաջարկ Հայաստանին» ծրագրի ներկայացման ժամանակ:

Մեր երկիրը կանգնած է ճակատագրական ընտրության առաջ: Նորանկախ Հայաստանը երբեք նման իրավիճակում չի եղել: Սա կուսակցական, խմբային ընտրություն չէ, որ մենք մրցենք, թե քանի տեղ կունենանք ապագա խորհրդարանում:

Հենց այդ պատճառով է, որ «Մայր Հայաստանը», որը վերջին 3 տարիներին դրական արդյունքներով մասնակցել է համապետական նշանակություն ունեցող տեղական ընտրություններին, որոշել է մի կողմ դնել կուսակցական շահը և միանալ, հարստացնել «Առաջարկ Հայաստանին» ծրագիրը և խորհրդարանական ընտրություններին մասնակցել Գագիկ Ծառուկյանի գլխավորած «Բարգավաճ Հայաստան» կուսակցության հետ:

Մեր որոշումը նաև պայմանավորված էր իմ և Գագիկ Ծառուկյանի՝ փոխադարձ վստահության ու հարգանքի վրա հիմնված երկար տարիների գործընկերային հարաբերությամբ:

Հարգելի՛ գաղափարակիցներ,

Մեր ժողովուրդը մեզանից սպասում է լուծումներ․ ինչպե՞ս դուրս գալ այս խիստ վտանգավոր իրավիճակից: Մարդիկ երկու խոշոր խնդրի պատասխան են սպասում՝

1. ինչպես ապահովել անվտանգություն և երաշխավորված խաղաղություն,

2. ինչպես զարգացնել տնտեսությունը և հաստատել սոցիալական արդարություն:

Հարգելի՛ բարեկամներ,

Որպեսզի մենք կարողանանք զարգացնել մեր երկիրը, հաստատել արդարություն, նախ պետք է ապահովենք երկարատև և երաշխավորված խաղաղություն: Մեր ժողովրդին մենք ներկայանում ենք 10 առաջարկով, որոնց մի մասը հիմա կհնչեցնեմ:

Երաշխավորված խաղաղության և անվտանգության մասին

Այն, ինչ այսօր ունենք, ժամանակավոր հրադադար է, ոչ թե խաղաղություն, որի երաշխավորը, ինչպես անկեղծորեն ներկայացրեց ՔՊ-ականներից մեկը, Իլհամ Ալիևն է:

Որևէ մեկը հավատո՞ւմ է Ալիևի երաշխիքներին: Պատասխանը պարզ է անգամ դպրոցականի համար:

Երաշխավորված և կայուն խաղաղության համար անհրաժեշտ է ապավինել սեփական ուժերին, ունենալ դաշնակիցներ, վարել հավասարակշռված արտաքին քաղաքականություն։ Չի՛ կարելի Հայաստանը վերածել աշխարհաքաղաքական մանրադրամի ու մեր երկիրը դարձնել բախումների թատերաբեմ:

2008-ի Վրաստանը, այսօրվա Ուկրաինան այն օրինակներն են, որոնցից մենք պետք է դասեր քաղենք: Մի՞թե Արցախի կորուստը մեզ դաս չեղավ: Համոզված եմ, որ մեր ժողովրդի մեծ մասն արդեն ամեն ինչ հասկացել է:

Հարգելի՛ ժողովուրդ,

Մենք վերականգնելու ենք Հայոց բանակը՝ այն դնելով պրոֆեսիոնալ հիմքերի վրա:

Մենք վերականգնելու ենք նաև մեր բնական դաշնակիցների՝ Ռուսաստանի ու Իրանի հետ հարաբերությունները: Օրվա իշխանությունների վարած արկածախնդրային, անխոհեմ ու բացառապես սեփական նեղ շահի վրա հիմնված արտաքին քաղաքականության արդյունքում մենք հիմա կանգնած ենք Ռուսաստանի հետ տնտեսական պատերազմի նախաշեմին: Դրա հետևանքով կարող են փակվել ավիափոխադրումները, ավելի քան 3 անգամ կթանկանա գազը, գյուղացին կկանգնի մթերքի իրացման խնդրի առաջ, կզրոյացվի դեպի ՌԴ արտահանումը, Ռուսաստանում խնդիրներ կառաջանան հայ գործարարների համար, թույլ չի տրվի այնտեղից գումարներ ուղարկել: Հարց է առաջանում՝ ո՞ւմ է սա ձեռնտու: Պատասխանն ակնհայտ է՝ ո՛չ Հայաստանին:

Մենք էլ հարցեր ունենք Ռուսաստանին, բայց այդ հարցերը բարձրացնելու ենք՝ դրանք բարեկամաբար լուծելու, մեր երկրի համար օգուտներ ապահովելու, այլ ոչ թե արհեստական հակադրություն ստեղծելու և թշնամանալու նպատակով: Մենք պետք է շահերի համադրում իրականացնենք և փոխշահավետ հարաբերություններ հաստատենք բոլորի հետ:

Պետք է խորացնել հայ-վրացական հարաբերությունները:

ԱՄՆ-ի, Եվրամիության հետ գործընկերային կապերի զարգացումը նույնպես բխում է մեր շահերից: Մասնավորապես՝ պետք է ակտիվ բանակցել դեպի ԵՄ ՀՀ քաղաքացիների առանց վիզայի ռեժիմ սահմանելու համար: Ութ տարի այս, իբր, արևմտամետ իշխանությունները, սանտիմետր անգամ այս հարցում առաջխաղացում չեն արձանագրել:

Ես հենց դրա համար եմ ասում, որ բոլոր այն պնդումները, թե սա ռուսամետ է, սա՝ արևմտամետ, դատարկ խոսակցություններ են: Կարևոր է որ իշխանությունը լինի հայամետ, այլ ոչ թե աթոռամետ:

Չինաստանի, Հնդկաստանի, արաբական երկրների հետ կապերի զարգացումը հսկայական տնտեսական օգուտներ կարող է բերել: Ինչո՞վ ենք մենք պակաս Վրաստանից, որն այդ երկրներից միլիարդավոր ներդրումներ է ստանում:

Ինչ վերաբերում է հայ-թուրքական հարաբերություններին, ապա մենք կողմ ենք Թուրքիայի հետ միջպետական հարաբերություններ հաստատելուն՝ առանց նախապայմանների: Մենք կողմ ենք Ադրբեջանի հետ խաղաղ կարգավորմանը։ Մեր դիրքորոշումը հետևյալն է.

• Հայ-ադրբեջանական սահմանի սահմանագծում և սահմանազատում ողջամիտ ժամկետում՝ կոնկրետ քարտեզով և իրավական հիմքով, • ռազմագերիների անվերապահ վերադարձ՝ որպես վստահության ձևավորմանն ու խաղաղ գործընթացին նպաստող կարևորագույն հարց, • արցախցիների վերադարձի իրավունքի ապահովում՝ միջազգային անվտանգության երաշխիքների և միջազգային գործընկերների մասնակցության ներքո, • հայ-ադրբեջանական հարաբերություններում միջնորդ-երաշխավորների ինստիտուտի ներմուծում, • Հայաստանի ներքին որոշումները չեն կարող կայացվել ադրբեջանական ճնշման տակ, այդ թվում՝ կապված մեր Սահմանադրության հետ:

Արցախի մասին

Բազմիցս ասել եմ, հիմա կրկնեմ՝ ով չի ափսոսում Արցախի կորստի համար, նա սիրտ ու հոգի չունի, իսկ ով հայտարարում է, որ հենց վաղը հետ է բերելու Արցախը, նա խելք չունի կամ խաբում է: Առաջարկում եմ այս պահին ողջունել Արցախից բռնի տեղահանված մեր հայրենակիցներին:

Տնտեսական քաղաքականության մասին

Հայաստանի Հանրապետության հանրային, տնտեսական և սոցիալական կյանքի գրեթե բոլոր ոլորտներում ներկայումս ձևավորվել է ճգնաժամային իրավիճակ, որի հաղթահարման համար անհրաժեշտ է իրականացնել նոր տնտեսական քաղաքականություն։

Մենք ունենք բոլոր հնարավորություններն առաջիկա 5 տարում ավելի քան կրկնապատկել մեր համախառն ներքին արդյունքը:

Մրցունակ տնտեսությանը և հարկային ողջամիտ քաղաքականությանը հասնելու համար մասնավորապես անհրաժեշտ է.

• 10 մարզերում հարկերից ազատված 10 արդյունաբերական գոտի ստեղծել, • Առաջիկա երկու տարիների ընթացքում նվազագույն աշխատավարձը փուլային տարբերակով դարձնել 150.000 դրամ, • տարեկան մինչև 60 միլիոն դրամ շրջանառություն ունեցող միկրոբիզնեսի ներկայացուցիչները պետք է ազատվեն շրջանառության հարկից (0 % հարկ), • տարեկան 60-ից մինչև 180 միլիոն դրամ շրջանառություն ունեցող փոքր բիզնեսի համար շրջանառության հարկը պետք է սահմանել 1 տոկոսը, • պետք է կրկնակի կրճատել գույքահարկի չափը: Լուրջ խնդիր է բանկային տոկոսների տակ մեր քաղաքացիների ճկռելը: Մենք դեմ ենք վարկային գերությանը և բանկային ռեկետին: Դրա համար մասնավորապես առաջարկում ենք՝ • Մինչև 5 միլիոն դրամ վարկեր ունեցողների համար տույժ-տուգանքների մասով հայտարարել վարկային համաներում։

Սոցիալական համերաշխության, կրթության և արժանապատիվ թոշակի մասին

2018-ին ժողովրդին խոստացան սոցիալական արդարություն, բայց իշխանավոր դառնալուց հետո հայտարարեցին, որ աղքատությունը մարդկանց գլուխներում է՝ զուգահեռաբար հաղթահարելով աղքատությունն իրենց գրապաններում ու դատարկ թողնելով իրենց գլուխները պետական կառավարման հարցերում:

Աղքատության հաղթահարումը մեզ համար պատվի հարց է: Թոշակային տարիքի անցնելը չպետք է դատավճիռ դառնա:

• Ամսական կենսաթոշակի նվազագույն չափը 2027թ․-ից փուլային տարբերակով պետք է դարձնել 100.000 դրամ։ • Յուրաքանչյուր տարի թոշակների չափն ավելացնել նախորդ տարվա ինֆլյացիայի չափով։

Կրթության ոլորտը նույնպես պետք է պետական լուրջ հոգածության ներքո հայտնվի: Պետական ու համայնքային պատկանելություն ունեցող բոլոր կրթօջախները (մանկապարտեզներ, դպրոցներ, միջին մասնագիտական հաստատություններ՝ քոլեջներ, բարձրագույն ուսումնական հաստատություններ) պետք է դարձնել անվճար։

Հանրային համերաշխության մասին

Մեր հանրությանը պառակտել են, թշնամացրել են, թուլացրել են, վախեցրել են։ Մենք համախմբելու ենք, հաշտեցնելու ենք, հզորացնելու ենք, ապահուսահատեցնելու ենք:

Օրվա իշխանությունը խոստացավ արդար պետություն կառուցել, բայց գրեթե զրոյացրեց հետանկախական շրջանի մեր բոլոր դրական ձեռքբերումները և միևնույն ժամանակ խորացրեց նախկինում առկա բոլոր արատավոր բարքերը: Մենք այս պատկերը պետք է փոխենք՝ ձևավորելով նոր որակի իշխանություն և նոր որակի Հայաստան:

Հարգելի՛ քաղաքացի, ուղիղ քեզ եմ դիմում՝ որպես ընկեր, որպես բարեկամ, որպես քեզանից մեկը:

Հունիսի 7-ին անպայման գնա՛ ընտրատեղամաս և քվեարկի՛ր հանուն մեր երկրի: Գնա, որպեսզի սրանք գնան: Գնա, որպեսզի մնա Հայաստանը: Գնա, որպեսզի նորից չլինեն պատերազմներ, զոհեր, ավերածություններ, կորուստներ, նվաստացումներ: Գնա, որպեսզի մենք երաշխավորված խաղաղություն ունենանք, մեր երեխաներն ապագա ունենան, Հայաստանը չմնա առանց դաշնակիցների: Գնա, որպեսզի մենք բանիմաց և ունակ իշխանություն ունենանք:

Մենք պատասխանատվությունից չենք խուսափում: Ակնկալում ենք ժողովրդի վստահության քվեն: Պատրաստ ենք վերցնել իշխանական բեռը, կերտել բոլորիս երազանքների Հայաստանը: Մեզ և մեր ժողովրդին ուժ, եռանդ, վճռականություն և հաղթանակ ենք մաղթում:

Կոչ ենք անում Հայաստանի քաղաքացուն՝ Միացի՛ր, որ փոխենք:

«Մայր Հայաստան» կուսակցության նախագահ Անդրանիկ Թևանյանի ֆեյսբուքյան էջից