Վրաստանի սահմանային ոստիկանությունը Աբխազիայի տարածք անթույլատրելի կերպով մուտք գործելու համար ձերբակալել է թուրքական «Օսման Հասրեթլեր» նավի կապիտան, Թուրքիայի քաղաքացի Ռեսուլ Ղարային։ Այս մասին տեղեկացնում է «Նովոստի Գրուզիա»–ն։

Թուրքիայի քաղաքացին մեղադրվում է «բռնազավթված տարածքում տեղաշարժման կանոնների խախտման» համար։ Նրան սպառնում է մինչև 5 տարվա ազատազրկում։

Վրաստանը Աբխազիան համարում է իր տարածքը, և ըստ վրացական օրենսդրության՝ այդտեղ մուտք գործելը արգելված է, իսկ Աբխազիայի ջրային տարածքը համարվում է նավարկության համար փակ։

Տեղեկացնենք, որ 2009թ. նույնպես եղել են նմանօրինակ միջադեպեր. այն ժամանակ  Աբխազիա վառելիք տեղափոխող թուրքական մի քանի նավեր կալանվել էին, ինչը պաշտոնական Սուխումին «վրացական ծովահենություն» էր անվանել։