Այսօր հրավիրված մամլո ասուլիսի ժամանակ հուշարձանագետ Սամվել Կարապետյանը հայտարարել է, որ օրերս վրաց պատիարքարանի արած հայտարարությունը, թե Թբիլիսիի ներկայիս Սբ. Նշան եկեղեցու տեղում հնում վրացական ուղղափառ եկեղեցի է եղել, զուրկ է փաստերից ու անհիմն է:

–Եկեղեցին գտնվում է Վրաստանում, նախկին Հակոբ Հակոբյան և Սերեբրյաննայա փողոցների խաչմերուկում: Դա հայկական եկեղեցի է, մենք ունենք երեք հիշատակություն, որոնք փաստում են, որ, այո, Սբ. Նշանից առաջ տեղում եղել է եկեղեցի, բայց դա էլ է եղել հայկական,-ասել է Կարապետյանը:

Հուշարձանագետը նշում է նաև, որ առաջին հրդեհը մարելուց հետո ջուրն ամբողջովին ոչնչացրել է պատմական մասունքները, ինչն անթույլատրելի է: Հրդեհից ամբողջովին ոչնչացվել են նաև ներսումի որմնանկարները, ու պատերին ճաքեր են առաջացել: Սամվել Կարապետյանը տարօրինակ փաստ է համարում այն, որ Սբ. Նշանը պատմական հուշարձանի կարգավիճակ է ստացել ընադամենը երկու տարի առաջ, թեև եկեղեցին այդ կարգավիճակն ունեցել է դեռևս խորհրդային տարիներին:

Փորձագետը համարում է, որ եկեղեցու շուրջը ստեղծված իրադրությունը պատահականություն չէ.

–Պատճառը միայն հայատյացությունն է: Հայերի նկատմամբ ահավոր թույն է տարածվում վրացական մամուլում: Նրանք ընդհանրացնում են հայ ազգը, հեգնում են մեզ, լուրջ չեն վերաբերվում: Միակ փրկությունը կեցվածքի փոփոխությունն է, իսկ դա կարող է լինել, եթե հաղթահարենք անտարբերությունը: