Այսօր հրավիրված համատեղ մամլո ասուլիսի ժամանակ ՀԱԿ ներկայացուցիչ Գուրգեն Եղիազարյանը և ԱԺ ՀՀԿ–ական պատգամավոր Լեռնիկ Ալեքսանյանը անդրադարձել են ներքաղաքական իրավիճակին։ Խոսելով իշխանության հասցեին ՀԱԿ համակարգող Լևոն Զուրաբյանի երեկվա քննադատությունից ու սուր խոսքերից («իշխանությունը թալանչի է» և այլն)՝ Լեռնիկ Ալեքսանյանը նշել է, որ նորմալ է գնահատում դա, նման քննադատություններ միշտ էլ եղել են, և բնական է, որ նախընտրական փուլում դրանք պետք է միայն սրվեն։ –Չի լինում այնպես, որ մի կողմը հրեշտակներ են, մյուս կողմը՝ սատանաներ,–ընդգծել է Ալեքսանյանը՝ հավելելով, որ բոլոր տեղերում էլ լինում են թե՛ հրեշտակներ, թե՛ սատանաներ։ Եղիազարյանն իր հերթին համաձայնել է Զուրաբյանի քննադատության հետ՝ նշելով, որ երկրում տնտեսական  ծանր վիճակ է, աղքատությունը հասել է բարձր չափերի. –Այսքանից հետո ուզում եք՝ Զուրաբյանը չասի՞, որ երկիրը թալանում են։ Եղիազարյանը կոչ է արել ազատ և արդար ընտրություններ անցկացնել ու ավելացրել է. –Ու եթե նման ընտրություններում սովածներն ու կիսաքաղցները գան ու ձայն տան ՀՀԿ–ին, մենք կողջունենք և երկու ձեռքով կծափահարենք։ Միաժամանակ, Եղիազարյանը հայտարարել է, որ եթե ընտրությունները կեղծվեն, «այս անգամ ՀԱԿ–ը գնալու է մինչև վերջ». –Ժողովուրդը ոտքի է կանգնելու և գնալու է իշխանափոխության։ Բավական է, արդեն հնարավոր չէ այսպես ապրել։

7or.am