«Հայկական ժամանակ» օրաթերթի գլխավոր խմագիր Նիկոլ Փաշինյանն այսօր երեկոյան հրավիրված ասուլիսի ժամանակ ասել է, որ իրենց թերթի թողարկման պատասխանատու Հայկ Գևորգյանին կալանավորել և նրա նկատմամբ քրեական գործ են հարուցել, քանի որ Գևորգյանի «Եվ Աստված ասաց, Վովա» ու «Յաշիկս վկա» հոդվածները զայրացրել են ոստիկանապետ Վովա Գասպարյանին:

Փաշինյանը պատմել է, որ օրեր առաջ ՀՀ էկոնոմիկայի նախարարության շենքից դուրս գալով՝ Հայկ Գևորգյանը ցանկացել է մեքենայով հետընթաց կատարել, սակայն մի մարդ համառորեն կանգնել է մեքենայի հետևում և տեղից չի շարժվել։ Հայկը նրան խնդրել է հեռու գնալ։ Բայց երբ մեքենան շարժվել է, լսել է, որ այդ քաղաքացին սկսել է բղավել՝ «վա՜խ, վա՜խ»: Հայկը համոզվելով, որ իրականում ոչինչ էլ չի եղել, հեռացել է այնտեղից։

Ավտոմեքենան գրանցված է Նիկոլ Փաշինյանի կնոջ՝ Աննա Հակոբյանի անունով:

–Վովա Գասպարյանն իսկական «մասկի շոու» է կազմակերպել,-ասել է Նիկոլ Փաշինյանը։