Սիրիայի դեմ պատժամիջոցների նոր փաթեթը, ինչպես նախատեսվում է, փետրվարի 27–ին Բրյուսելում կայանալիք նիստում կհաստատվի ԵՄ  անդամ 27 երկրների արտգործնախարարների կողմից։ Այս մասին, ինչպես հաղորդում է «ՌԻԱ նովոստի»–ն, հայտարարել է Եվրամիության դիվանագիտության ղեկավար Քեթրին Էշթոնը։

Սիրիայի նկատմամբ պատժամիջոցների նոր փաթեթը կներառի նաև Եվրամիության երկրներում այդ երկրի կենտրոնական բանկի ակտիվների սառեցում։ Նախատեսվում է, որ պատժամիջոցների հետևանքով կարգելվի ֆոսֆատների, ոսկու և այլ թանկարժեք մետաղների ու ադամանդի ներմուծում–արտահանումը Սիրիա։

Հիշեցնենք, որ Սիրիայի նկատմամբ խիստ պատժամիջոցների բանաձևի նախագիծ փետրվարի 4–ին քվեարկության էր դրվել ՄԱԿ–ի Անվտանգության խորհրդում, սակայն Ռուսաստանի և Չինաստանի վետոյի կիրառման պատճառով չի ընդունվել։