Լիբերիայի նախկին նախագահ Չառլզ Թեյլորը, ում ավելի վաղ Հաագայի միջազգային դատարանը մեղավոր էր ճանաչել ռազմական հանցագործությունների մեջ, այսօր դատապարտվել է 50 տարվա ազատազրկման։ 64–ամյա նախկին նախագահի համար դա թերևս ցմահ բանտարկություն է նշանակում։

Թեյլորը մեղադրվում էր Սիերա–Լեոնեում գործող ապստամբներին աջակցելու, զանգվածային սպանությունների, բռնաբարությունների, ինչպես նաև երեխաներին որպես զինվոր օգտագործելու խրախուսման համար։ Թեյլորն ինքը չի մասնակցել Սիերա–Լեոնեի քաղաքացիական պատերազմին, սակայն բազմակողմանի օգնություն է տրամադրել այնտեղ գործող «Միացյալ հեղափոխական ճակատին»։ Այդ կազմակերպության գրոհայինները Թեյլորից ստացել են ֆինանսավորում և զենք։ 10 տարի տևած քաղաքացիական պատերազմի զոհ է դարձել առնվազն 120 հազ մարդ։