2013թ. մարտ ամսվա շրջակա բնական միջավայրի աղտոտվածության մշտադիտարկմամբ պարզվել է, որ ամենափոշոտ քաղաքը Արարատն է։

Այս մասին «7օր»–ը տեղեկացել է Ազգային վիճակագրական ծառայությունից, որի տվյալները հիմնված են ՀՀ բնապահպանության նախարարության տեղեկատվության վրա։

ՀՀ շրջակա բնական միջավայրը 2013թ. մարտին ունեցել է հետևյալ բնութագիրը.

Երևան քաղաքի 6 դիտակայաններում ակտիվ նմուշառման եղանակով մթնոլորտային օդի փորձանմուշներում որոշվել են փոշու, ծծմբի երկօքսիդի, ազոտի երկօքսիդի և գետնամերձ օզոնի պարունակությունները: Ակտիվ նմուշառման միջոցով վերցվել է օդի 661 փորձանմուշ: Որոշված նյութերից փոշու միջին ամսական խտությունը թույլատրելի չափը գերազանցել է 1,4 անգամ:

Գյումրի քաղաքի փոշու միջին ամսական խտությունը այդ չափը գերազանցել է 1,9 անգամ, ծծմբի երկօքսիդի միջին ամսական խտությունը՝ 1,6 անգամ:

Վանաձորում փոշու միջին ամսական խտությունը գերազանցել է 4,2 անգամ, ծծմբի երկօքսիդինը՝ 1,5 անգամ:

Ալավերդի քաղաքի փոշու միջին ամսական խտությունը թուլյատրելի չափը գերազանցել է 3,5 անգամ, ավտոմատ կայանին հարակից տարածքի մթնոլորտային օդի փորձանմուշներում ծծմբի երկօքսիդի միջին ամսական խտությունը՝ 2,6 անգամ:

Հրազդան քաղաքում ընդհանուր առմամբ վերցվել է օդի 93 փորձանմուշ: Մթնոլորտային օդում ցեմենտի փոշու միջին ամսական խտությունը թույլատրելի չափը գերազանցել է 2,8 անգամ:

Արարատ քաղաքի մշտական դիտակայանում ցեմենտի փոշու պարունակության որոշման համար ակտիվ նմուշառման եղանակով վերցվել է օդի 31 փորձանմուշ: Փոշու միջին ամսական խտությունը թույլատրելի չափը գերազանցել է 4,6 անգամ:

Ծաղկաձոր քաղաքի պասիվ նմուշառման 14 դիտակետերի միջոցով վերցված մթնոլորտային օդի 140 փորձանմուշներում որոշվել են ծծմբի երկօքսիդի և ազոտի երկօքսիդի պարունակությունները: Որոշված նյութերի միջին ամսական խտությունները դիտվել են թույլատրելի նորմաների սահմաններում:

Վաղարշապատ, Աբովյան, Սևան, Կապան և Մեղրի քաղաքներում վերցվել է մթնոլորտային օդի 157, 150, 80, 90 և 6 փորձանմուշ:

Արարատի մարզի Բուրաստան գյուղում և Վայոց ձորի մարզի Արենի գյուղում ծծմբի երկօքսիդի և ազոտի երկօքսիդի միջին ամսական խտությունները դիտվել են թույլատրելի նորմաների սահմաններում:

Ամբերդ գյուղում ազոտի երկօքսիդի և ամոնիակի միջին ամսական խտությունները դիտվել են թույլատրելի նորմաների սահմաններում:

7or.am