Լրահոս

13.07.2009 18:05


Ի պաշտպանություն Նիկոլ Փաշինյանի «Այլընտրանք» հասարակական-քաղաքական նախաձեռնության hայտարարությունը

Հայաստանի քաղբանտարկյալների ցուցակը «համալրվեց» եւս մեկ անունով' քաղաքական հայացքների եւ գործունեության համար կալանավորվեց «Հայկական Ժամանակ» օրաթերթի գլխավոր խմբագիր, «Այլընտրանք» հասարակական-քաղաքական նախաձեռնության հիմնադիր անդամ, ճանաչված լրագրող եւ հրապարակախոս Նիկոլ Փաշինյանը:

Նիկոլ Փաշինյանի նկատմամբ տարիներ շարունակվող  քաղաքական հետապնդումները նոր թափ ստացան  2007 թվականի հոկտեմբերի 23-ին հանրահավաքի իրազեկման  թռուցիկներ բաժանելիս' ոստիկանության կողմից սադրանք կազմակերպելուց հետո: Ակնհայտ է, որ ապօրինի իշխանությունները առ այսօր շարունակում են հետապնդել տեղեկատվական թռուցիկներ տարածող քաղաքացիներին,  որի վառ վկայությունն է ՀԱԿ երիտասարդ ակտիվիստ Տիգրան Առաքելյանի նկատմամբ օրերս հարուցված խայտառակ քրեական գործն ու անօրինական կալանավորումը:

Նիկոլ Փաշինյանի քաղաքական հետապնդումը ցույց է տալիս, թե ինչպիսի թշնամանքով եւ քինախնդրությամբ է բռնապետությունը վերաբերվում երկրի ապագայի համար պայքարող քաղաքացիներին:

Անհերքելի  փաստ է, որ Նիկոլ Փաշինյանն ազատազրկված է քաղաքական գործունեության համար:

Նիկոլ Փաշինյանի կալանավորման մասին որոշումն, անկասկած, կայացվել է «հրամանագրով», եւ, ըստ էության, ցույց է տալիս, որ ԵԽԽՎ բանաձեւերի կոչերի եւ հորդորների կատարմանն ուղղված' Հայաստանի իշխանությունների քայլերն իմիտացիոն բնույթ  են կրում:

Նիկոլ Փաշինյանը քաղբանտարկյալ է եւ պետք  է անմիջապես ազատ արձակվի:

«Այլընտրանք» հասարակական-քաղաքական նախաձեռնութունը պահանջում է անհապաղ դադարեցնել քաղաքական հետապնդումները  նրա նկատմամբ եւ կարճել այդ շինծու քրեական գործը:

«Այլընտրանք» հասարակական-քաղաքական նախաձեռնություն

13.07.2009.

Այս խորագրի վերջին նյութերը