Ս.թ. հուլիսի 16-ին Հայաստանի արտգործնախարար Էդվարդ Նալբանդյանն այցելեց Ստեփանակերտ:

Ստեփանակերտ ժամանելուն պես Էդվարդ Նալբանդյանին ընդունեց ԼՂՀ նախագահ Բակո Սահակյանը:

Նախագահ Սահակյանն ու նախարար Նալբանդյանը քննարկեցին ղարաբաղյան հակամարտության կարգավորման գործընթացին առնչվող հարցեր:

            Հանդիպումից հետո Հայաստանի արտգործնախարարը վերադարձավ Երևան:

            Հանդիպումից հետո Էդվարդ Նալբանդյանը ճեպազրույց ունեցավ լրագրողների հետ, որի ընթացքում պատասխանեց հետևյալ հարցերին:

            Հարց.   Իտալիայում Մեծ ութնյակի գագաթաժողովին նախագահներ Մեդվեդեւը, Սարկոզին և Օբաման հայտարարությամբ հանդես եկան ղարաբաղյան հիմնախնդրի կարգավորման վերաբերյալ: Ինչպե՞ս կմեկնաբանեք այդ հայտարարությունը:

            Պատասխան. - Մենք գնահատում ենք  Ռուսաստանի, Միացյալ Նահանգների և Ֆրանսիայի նախագահների ցանկությունը և հետեւողական ջանքերը որպես ԵԱՀԿ Մինսկի խմբի համանախագահ երկրների ղեկավարներ աջակցելու կողմերին՝ մոտեցնելու դիրքորոշումները և ընթանալու հիմնախնդրի կարգավորման ուղղությամբ:

Ինչ վերաբերվում է ԵԱՀԿ-ի և Մինսկի խմբի համանախագահ երկրների պաշտոնական կայքէջերում տեղակայված Մադրիդյան փաստաթղթի որոշակի մանրամասներին, դրանք առաջարկներ են բանակցությունների համար, որոշ դրույթների շուրջ ընթանում են բանակցություններ, որոշները չեն քննարկվում:

Կցանկանայի ուշադրություն հրավիրել այն հանագամանքի վրա, որ այստեղ կան այն երեք սկզբունքները, որոնք Հայաստանը բազմիցս հայտարարել էր՝ որպես հիմնախնդրի կարգավորման հիմնարար սկզբունքներ:  Դրանք են. Ղարաբաղի  իրավական կարգավիճակը պետք է որոշվի Լեռնային Ղարաբաղի ժողովրդի կամքի արտահայտմամբ, որը պետք է ունենա պարտադիր իրավական ուժ, անխափան ցամաքային կապ Հայաստանի և Արցախի միջև, անվտանգության միջազգային երաշխիքներ: Եվ հիշեցնեմ, որ եթե Ադրբեջանը մինչև այսօր շարունակում է խոսել միայն տարածքային ամբողջականության մասին, իսկ Հայաստանը բազմիցս արտահայտվել է հարցի կարգավորման վերաբերյալ հիմնված երեք սկզբունքների՝ ազգերի ինքնորոշման, տարածքային ամբողջականության և ուժի կամ ուժի սպառնալիքի չկիրառման սկզբունքների վրա, ապա հրապարակված մանրամասները հավաստում են այն, ինչի մասին ասում էր և ասում է Հայաստանը:

            Հարց. Պարոն նախարար, ԵԱՀԿ պաշտոնական կայքէջում հրապարակված սկզբունքների մեջ ներառված է տեղահանված անձանց և փախստականների վերադարձի մասին դրույթը: Ի՞նչ է դա ենթադրում:

            Պատասխան. Ես արդեն արտահայտվել էի այդ կապակցությամբ և կարող եմ նորից կրկնել, որ փախստականների՝ Ղարաբաղ վերադարձի վերաբերյալ որևիցե քննարկում չի ընթանում: Այդ հարցին կարելի է անդրադառնալ միայն ղարաբաղյան հիմնախնդրի վերջնական  կարգավորումից հետո, ավելի լայն կոնտեքստում՝ նկատի ունենալով  նաև մոտ 400.000 հայ փախստականների հարցը:

            Հարց. ԼՂՀ նախագահն իր վերջին հարցազրույցում նշել էր, որ Արցախին չի գոհացնում բանակցությունների ներկայիս ձևաչափը: Տպավորություն է ստեղծվում, որ ԼՂՀ իշխանություններն այլ մոտեցումներ ունեն հիմնախնդրի կարգավորման ընթացքի վերաբերյալ: Ի՞նչ կասեք այդ  կապակցությամբ:

            Պատասխան. Հայաստանը Ղարաբաղի լիակատար մասնակցությունը բանակցություններին համարում է անհրաժեշտություն և խաղաղ գործընթացի արդյունավետության երաշխիք:

            Բնական է, որ Ղարաբաղը որոշ հարցերում, կարող է այլ մոտեցումներ ունենալ, բայց կցանկանայի ընդգծել, որ Լեռնային Ղարաբաղի Հանրապետության  կարծիքը  մեզ համար մեծ և կարևոր նշանակություն ունի, և Հայաստանը ոչ միայն չի կարող անտեսել այն, այլև չի կարող գնալ որևիցե համաձայնության առանց Արցախի ժողովրդի և ղեկավարության հավանության, և այսօր իմ այստեղ գտնվելը դրա ևս մեկ ապացույցն է: