Հուլիսի 16-ին ՀՀ արտաքին գործերի նախարար Էդվարդ Նալբանդյանը մեկնել էր Լեռնային Ղարաբաղի Հանրապետություն, որտեղ հանդիպում է ունեցել ԼՂՀ նախագահ Բակո Սահակյանի հետ։ Նախագահի հետ հանդիպումից հետո արտգործնախարարը պատասխանել է լրագրողների հարցերին։ Հետաքրքրական է, որ ԱԳՆ-ի պաշտոնական կայքէջում տեղադրված հարցուպատասխաններում որոշ հարցեր ընդհանրապես բացակայում են, որոշ տրված հարցերին  ուրիշ պատասխան է տեղադրվել և այլն։ Կայքէջում տեղ չեն գտել նաև Արցախի լրագրողների հարցերն ու դրանց պատասխանները։

Մասնավորապես՝ «Հո՞ղ ենք տալիս Ադրբեջանին» հարցին ի պատասխան՝ արտգործնախարար Է. Նալբանդյանը հիշեցրել է Ռուսաստանի, Միացյալ Նահանգների և Ֆրանսիայի նախագահների կողմից վերջերս արված հայտարարությունը և շեշտել, թե գնահատելի է, որ երեք երկրներն այդպիսի ուշադրությամբ են վերաբերվում հարցին։ Նա նկատել է, որ դա նորություն չէ, և նրանք հետևողական ջանքեր են գործադրել օգնելու կողմերին՝ մոտեցնելու դիրքորշումները և ընթանալ դեպի հիմնախնդրի կարգավորում։ Այս հարցի պատասխանը կայքէջում ներկայացված է որպես հետևյալ հարցի պատասխան. «Իտալիայում «Մեծ ությակի» գագաթաժողովին նախագահներ Մեդվեդևը, Սարկոզին և Օբաման հայտարարությամբ հանդես եկան ղարաբաղյան հիմնախնդրի կարգավորման վերաբերյալ: Ինչպե՞ս կմեկնաբանեք այդ հայտարարությունը»։

«Ի՞նչ նկատի ունեք Ղարաբաղի ժողովուրդ ասելով՝ ԼՂՀ ներկայիս տարածքո՞ւմ ապրող, թե՞ ԼՂԻՄ-ի տարածքում» հարցին ի պատասխան, որը, ի դեպ, ընդհանրապես տեղ չի գտել կայքէջում, նախարարը պատասխանել է. «Լեռնային Ղարաբաղում այսօր ապրող ժողովուրդը»:

Կայքէջում չի տեղադրվել նաև հետևյալ հարցուպատասխանը. «Խոսքն ինքնորոշման իրավունքի սկզբունքի՞ մասին է, թե՞ ինքնորոշման իրավունքի ճանաչման, քանի որ Ղարաբաղն արդեն ինքնորոշվել է»: Հարցին հետևլ է հետևյալ պատասխանը. «Ես ասացի՝ կամքի արտահայտում Ղարաբաղի ժողովրդի կողմից, այսինքն՝ Ղարաբաղի ժողովուրդը պետք է որոշի՝ ինչպե՞ս է ինքը ցանկանում ապրել, և ինչպե՞ս պետք է լինի այդ կարգավիճակը»:

ԱԳՆ հաղորդագրությունում փախստականների վերաբերյալ հարցուպատասխան է տեղադրվել, որը, սակայն, ինչպես տեղեկացրել են Արցախի լրագրողները, ճեպազրույցի ժամանակ ընդհանրապես չի հնչել։

ԱԳ նախարարը չի պատասխանել նաև «Արդյոք տարածքների հետ կապված բանակցություններ ընթանո՞ւմ են, թե ոչ» հարցին։

Արփի Բեգլարյան