ԱՄՆ իշխանությունները պատրաստ են փոքր–ինչ մեղմել Իրանի նկատմամբ կիրառվող տնտեսական պատժամիջոցները, եթե փոխհամաձայնություն ձեռք բերվի միջուկային ծրագրի հարցում։ «ԲԻ–Բի–Սի»–ի փոխանցմամբ՝ այդ մասին «Էն–Բի–Սի» հեռուստաընկերությանը տված հարցազրույցում ասել է ԱՄՆ նախագահ Բարաք Օբաման՝ մասնավորեցնելով, որ խոսքը «չափավոր» մեղմացման մասին է. հիմնական պատժամիջոցները շարունակելու են գործել։ Եթե պարզվի, որ Թեհրանը խախտել է ձեռք բերված պայմանավորվածությունները, ամերիկյան կողմը հետքայլ կանի։

Նշենք, որ հինգշաբթի Ժնևում Թեհրանի և «վեցնյակի» միջև սկսվել է Իրանի միջուկային ծրագրի շուրջ բանակցությունների նոր փուլը։ Սպասվում է, որ մեծ տերությունները կհամոզեն Իրանին անմիջապես դադարեցնել միջուկային ծրագրի զարգացումը՝ պատժամիջոցների մասնակի վերացման դիմաց։