Այսօր Ազգային ժողովում առաջին ընթերցմամբ ընդունվեց պետական պաշտոնյաների աշխատավարձերի բարձրացման մասին օրինագիծը։ ՀԱԿ խմբակցության ղեկավար Լևոն Զուրաբյանը հայտարարեց, որ Կոնգրեսը դեմ է քվեարկելու օրենքի նախագծին։ ԲՀԿ խմբակցության քարտուղար Նաիրա Զոհրաբյանը հայտնեց, թե ԲՀԿ-ն կողմ է, որ 160 հազար պետական ծառայողների աշխատավարձը բարձրանա, սակայն դեմ է բարձրաստիճան պաշտոնյաների աշխատավարձերի բարձրացմանը: Նա հայտարարեց, որ ԲՀԿ-ն դեմ է քվեարկելու օրինագծին`առանց որակումներ տալու։ Օրինագծին դեմ հանդես եկավ նաև «Ժառանգությունը»։ Ալեքսանդր Արզումանյանը հայտնեց, որ ինքը ձեռնպահ է քվեարկելու, իսկ անկախ պատգամավոր Խաչատուր Քոքոբելյանը՝ դեմ ։

ՀՅԴ խմբակցության քարտուղար Աղվան Վարդանյանն էլ ասաց, որ ՀՅԴ-ն կողմ է այս օրինագծին, քանի որ բարձրանալու է շուրջ 160 հազար պետական ծառայողների աշխատավարձը:

Օրինագիծն առաջին ընթերցմամբ ընդունվեց՝ 69 «կողմ», 31 «դեմ», 6 «ձեռնպահ» ձայների հարաբերակցությամբ։

7or.am