Վրաստանի ու ԵՄ–ի միջև ասոցացման մասին համաձայնագրի ստորագրումից հետո Աբխազիայի ու Հարավային Օսիայի բնակիչները հնարավորություն կունենան եվրոպական երկրներ մեկնել առանց վիզաների։ «Նովոստի-Գրուզիա»–ի փոխանցմամբ՝ այս մասին «Ռուսթավի-2» հեռուստաալիքի եթերում հայտարարել է Վրաստանի նախագահ Գեորգի Մարգվելաշվիլին։

«Մենք կապացուցենք Ցխինվալի բնակչությանը, որ ոչ ոք մտադիր չէ նրանց նվաճել։ Նրանք մեզ պետք են, որպեսզի միասին կառուցենք ժամանակակից, ժողովրդավարական ու եվրոպական Վրաստան»,-ասել է նախագահը։

Ըստ նրա՝ ԵՄ հետ նախաստորագրած ասոցացման համաձայնագիրը կհանգեցնի երկրի տնտեսության բարելավմանը, Եվրոպայի հետ վիզային ռեժիմի մեղմացմանը և վրացական հասարակության եվրաինտեգրմանը: