ՀՀ ԱԺ «Հայ ազգային կոնգրես» խմբակցության քարտուղար Արամ Մանուկյանն այսօր հրավիրված ասուլիսում ներկայացրել է 2013 թվականի թոփ 13 քաղաքական և տնտեսական ձախողումները:

Կորուստներից ամենամեծը նա համարում է ահագնացող արտագաղթը Հայաստանից:

–Սա երկիրն անկազմակերպ և անգիտակ ղեկավարելու արդյունքն է։ Իմ հաշվարկներով՝ 2013թ. Հայաստանից մեկնել և չի վերադարձել մոտ 150 հազար մարդ,-ասել է Ա. Մանուկյանը:

Ամենամեծ սկանդալն էլ նա համարում է «ՀայՌուսգազարդ» ընկերության վերջին 20% մասնաբաժնի վաճառքը «Գազպրոմ»-ին.

–Սա կմնա որպես ամենանվաստացուցիչ գործարքը հայ ժողովրդի պատմության մեջ: Սա քրեական հանցագործություն է: Սա տարվա վերջին ամենամեծ քյալլագյոզությունն էր։ Այսպիսի գործարք, նվաստացում հայ ժողովուրդը չի ունեցել անգամ ծանր ժամանակներում։

Անցնող տարվա մյուս ձախողումները, ըստ Արամ Մանուկյանի, նախագահական և Երևանի ավագանու կեղծված ընտրություններն են, պարտադիր կուտակային կենսաթոշակային համակարգի ներդրումը, գազի սակագնի թանկացումը, ՀՀ վարչապետ Տիգրան Սարգսյանի մասնակցությամբ օֆշորային սկանդալը, ասոցացման համաձայնագրի չնախաստորագրումը և ՄՄ–ին անդամակցելը, ՌԴ-ի հետ նվաստացուցիչ հարաբերությունները, Իրանի հետ գազային սկանդալը, նկարահանող արագաչափ սարքերը և վճարովի կայանատեղիները, հայոց լեզվի հանդեպ իշխանության ներկայացուցիչների քամահրական վերաբերմունքը, համատարած կոռուպցիան։

Օֆշորի թեմային անդրադառնալով՝ Ա. Մանուկյանն ընդգծել է.

–Դա այնպիսի սկանդալ է, որ վարչապետը պետք է առնվազն 5 անգամ հրաժարական տված լիներ։

ՀԱԿ խմբակցության քարտուղարի համոզմամբ՝ 2013թ. ձեռքբերում էլ է եղել՝ ԱԺ 4 ոչիշխանական խմբակցությունների համաձայնեցված աշխատանքը և լրագրողների ակցիան ԱԺ-ում: Նա ՀԱԿ–ի, ԲՀԿ–ի, ՀՅԴ–ի և «Ժառանգության» համագործակցությունն իշխանափոխության հասնելու միակ ձևն է համարում։

Ինչ վերաբերում է Սերժ Սարգսյանին, ապա, Ա. Մանուկյանի խոսքերով, նրա վիճակը ծայրահեղ վատ է:

–Դրսից փող չեն տալիս, ներսից չի կարողանում հավաքել: Իսկ Սերժ Սարգսյանն առանց փողի չի կարող ապրել,-եզրափակել է Ա. Մանուկյանը:

7or.am