Այսօրվա ասուլիսին ՀՀ էկոնոմիկայի նախարարի տեղակալ Գարեգին Մելքոնյանն ասել է, որ նախարարության կողմից կազմվել է առաջնային այն ապրանքների ցուցակը, որոնք համարվում են զգայուն, և Մաքսային միությանը միանալու դեպքում պետք է գործեն ՀՀ մաքսատուրքերի դրույքաչափերը։

«Այդ ցուցակը պետք է ներկայացվեր կոմիտեին, և սկսվեին քննարկումները: Այն կազմելու համար մենք շարունակում ենք մեր հանդիպումները գործարարների հետ, որոնք ևս ներկայացնում են այն ապրանքները, որոնք, ըստ իրենց, զգայուն են, և կարիք կա այդ ապրանքների մաքսատուրքերի վերաբերյալ բանակցել Ռուսաստանի հետ»,–ասել է բանախոսը։

Նախարարի տեղակալը նշել է նաև, որ ներքին քննարկումների ամփոփումից հետո ցանկը կներկայացվի ՄՄ համապատասխան մարմիններին հարցն ուսումնասիրելու և բանակցությունը սկսելու նպատակով:

Անդրադառնալով Հայաստանի անդամակցությանը Մաքսային միությանը՝ Մելքոնյանը պարզաբանել է, որ երրորդ երկրներից կատարվող ներմուծումների ժամանակ Հայաստանը պետք է կիրառի ՄՄ–ում այդ երկրների նկատմամբ գործող մաքսատուրքերի միասնական դրույքաչափեր.

«Ուզում եմ առանձնացնել, որ Մաքսային միության` ներկա պահին գործող մաքսատուրքերի դրույքաչափերի զգալի մասը գերազանցում է Հայաստանում ներկայումս գործող մաքսատուրքերի դրույքաչափերը»։

Խոսելով ՄՄ–ին միանալուց հետո հավանական գնաճից՝ Մելքոնյանն ասել է. «Մինչև չավարտվեն մաքսատուրքերի դրույքաչափերի փաթեթի շուրջ բանակցությունները, մենք չենք կարող ասել` գնաճ կլինի՞, թե ոչ, և եթե այո, ապա որքա՞ն կլինի»:

Ինչ վերաբերում է երրորդ երկրից մեքենա ներկրելուն և այն հետո ՄՄ երկրներ արտահանելուն, բանախոսը նշել է, որ այն պետք է կրկին անգամ մաքսազերծվի: Ըստ նրա՝ այդ հարցը հստակեցնելու կարիք ունի, և գտնվում է քննարկման փուլում:

7or.am