ՀՀ ԱԺ «Բարգավաճ Հայաստան» խմբակցության պատգամավոր Վահան Բաբայանը խորհրդարանական այսօրվա հայտարարությունների ժամին անդրադարձել է վերջին օրերին հասարակության շրջանում լայն քննարկման առարկա դարձած «Արարատցեմենտ» գործարանում կատարված միջադեպին:

–Բոլորիս քաջ հայտնի է Հայաստանում իշխանության քայլերի տրամաբանությունը, և ոչ մեկի համար գաղտնիք չէ, որ այդ միջադեպը ուղղակիորեն կապված է ԲՀԿ առաջնորդ Գագիկ Ծառուկյանի կողմից ԲՀԿ 7-րդ համագումարում հնչեցրած առաջարկների և քաղաքական գնահատականների հետ: Մեր օպոնենտները պետք է պատրաստ լինեն բաց քննարկումների, այլ ոչ թե մեջքի հետևից գործեն, բանավեճը, վերջիվերջո, պետք է դառնա Հայաստանի քաղաքական մշակույթի մաս: Սա Գագիկ Ծառուկյանի վրա ճնշման չհաջողված փորձ էր, իսկ այսպիսի միջադեպերը մնալու են իշխանության խղճին: Նման անարդյունավետ քայլերով իշխանությունները շուտով ստիպված կարձանագրեն, որ դատապարտված են իրենց տեղը զիջել այն քաղաքական ուժերին, ովքեր առաջարկում են լայն համախմբում, սփյուռքի կարողությունների կենտրոնացում մեր երկրում,–ասել է Վ. Բաբայանը:

Պատգամավորի խոսքերով՝ վերջին դեպքը «Արարատցեմենտ»-ում ավելի խորացրեց այն մտահոգությունը, որ ԲՀԿ–ի օպոնենտները պատրաստ չեն ընդունել իրենց կառավարության ձախողումները, և Գագիկ Ծառուկյանի բարձրաձայնած հարցերին պատասխանում են նման քայլերով:

–Օրինակ՝ սովորաբար իշխանության բերած բոլոր նախագծերին կողմ քվեարկող, «Ավշարի» սեփականատեր Արայիկ Գրիգորյանը որոշել է միտք արտահայտել ու իշխանության սպասարկու լրագրողին պարզաբանել է, որ «Արարատցեմենտ»-ը ջրօգտագործման պարտք ունի, և բնապահպանները ընդամենն իրենց վրա իջեցված պետպատվերն են կատարել՝ ջուրը տալով թուրքին: Այն, որ «Արարատցեմենտ»-ը որևէ լումայի պարտք չունի, դա անհերքելի փաստ է, և սույն պատգամավորը կարող էր իրեն նեղություն տալ և ճշտել, թե ով ում ինչ է պարտք: Ջրբաժանի մի կողմում են փոքր և միջին բիզնեսի ծանր վիճակը, արտագաղթը, հարկային ոչ էֆեկտիվ քաղաքականությունը, պարտադիր կուտակային կենսաթոշակային բարեփոխման հետ կապված հասարակական դժգոհությունը, վստահության դեֆիցիտը, իսկ մյուս կողմում՝ իշխանության մանր և անիմաստ հակաքայլերը: Համեմատությունը նույնիսկ անիմաստ է: «Բարգավաճ Հայաստանը» գալիս է փոխելու, խավարը և մութը պետք է տեղ չունենան 21-րդ դարի Հայաստանում,–ավելացրել է նա:

7or.am