Այսօրվա ասուլիսին տնտեսագետ Բագրատ Ասատրյանն ասել է, որ իշխանության պնդումը, թե վարչապետի հրաժարականը կապ չունի երկրի խնդիրների հետ, իրականությունից կտրված է: Նրա խոսքերով՝ հրաժարականը որևէ բան չի տա, եթե քաղաքական համակարգում փոփոխություններ չմտցվեն:

«Բացե՛ք Սերժ Սարգսյանի 2008-ի նախընտրական ծրագիրը, տեսե՛ք, թե ինչ էր խոստացել ու ինչ է արել: Ասում են, թե համաշխարհային ճգնաժամ էր, բայց դա ամբողջ աշխարհում էր, իսկ Հայաստանում առաջինը ուղեղների ճգնաժամի խնդիր է»,-ասել է նա:

Ըստ բանախոսի՝ այսօր Հայաստանում բոլոր խնդիրներն ընդդիմությունն է բարձրացնում. «Եթե այսօր իշխանությունը քայլ չաներ, ուրեմն փողոցում էին լուծվելու բոլոր հարցերը»:

Տնտեսագետ Վարդան Բոստանջյանի խոսքերով էլ՝ պետք չէ մտածել՝ ով կնշանակվի վարչապետի պաշտոնում, պետք է մտածել համակարգային փոփոխությունների մասին. «Երևի ռոմանտիկ կհնչի, բայց բոլոր բարձր պաշտոններում գտնվող այրերը պետք է նախ սիրեն երկիրը, չմտածեն, որ երկիրը միայն թալանելու համար է: Եկեք այնպիսի վարչապետ դնենք, որ գործից հասկանա, գործը իրականացնելու հնարավորություն ունենա, ոչ թե վախվորած մեկին, որ նույնիսկ վախենա խոսել»: