Ինպես արդեն տեղեկացրել էինք, այսօր Ազգային ժողովում փակ գաղտնի ձևաչափով տեղի կունենա ՀՀ Կենտրոնական բանկի նախագահի ընտրությունը։ Այդ պաշտոնում Սերժ Սարգսյանն առաջադրել է ԿԲ գործող նախագահ Արթուր Ջավադյանին։ Ավելի վաղ ՀԱԿ–ը, ԲՀԿ–ն և «Ժառանգությունը» պաշտոնապես հայտարարել են, որ չեն մասնակցելու ընտրությանը, իսկ ՕԵԿ–ն ազատ է թողել քվեարկությունը։ «7օր»-ի հարցին՝ ինչպե՞ս է քվեարկելու ՀՅԴ խմբակցությունը ԿԲ նախագահի ընտրությանը, Արմեն Ռուստամյանը պատասխանել է.

-Մեր մոտեցումը շատ հստակ է. դա մեր քաղաքական դիրքորոշումից է բխում: Ինչպես տեսել եք, մենք չենք մասնակցել վերջին փակ գաղտնի քվեարկություններին, որոնք տեղի են ունեցել: Եվ դա բացատրել ենք՝ ինչու: Հիմա այս պահին, բնականաբար, այդ դիրքորոշումը պահպանվում է, և այդ պատճառով է, որ չենք մասնակցելու: Այսինքն, անձի հետ կապված խնդիր մենք չունենք: Մեր խնդիրը կապված է ընդհանրապես քվեարկությունների տրամաբանության հետ, և մեր քվեարկել-չքվեարկելը որևէ ազդեցություն, ինչպես տեսնում ենք, արդյունքների վրա չի թողնում: Հակառակը՝ անձամբ ես անձի նկատմամբ շատ դրական վերաբերմունք ունեմ: Արթուր Ջավադյանը փորձառու մարդ է, մասնագետ է, դա ապացուցել է բազմիցս... Մենք ընդդիմություն ենք, և բնական է, որ ունենք, ասենք, մեր տարաձայնությունները, եթե չասեմ՝ հակադրությունը վարվող, ընդհանրապես, տնտեսական քաղաքականության հետ կապված:

Ինչ վերաբերում է կառավարության ներկայացրած ծրագրին, պատգամավորը նշել է, որ առաջին տպավորությունն այն է եղել, որ փորձ է արվել նրանց հիմնական առաջարկները շրջանցել. «Սակայն որոշ առաջարկներ ընդունվել են: Արդարության համար պետք է նշել, որ այնպես չի, որ ամբողջությամբ մերժվել են առաջարկները, բայց որքանով է դա մեզ գոհացնելու, վերջնական ուսումնասիրության արդյունքում կասենք։ Վերջնական վճիռը դեռ չենք կայացրել»:

7or.am