«Պոլիտէկոնոմիա» քաղաքական, տնտեսական և իրավական հետազոտությունների ինստիտուտը, «Ֆրիդրիխ Էբերտ հիմնադրամի» աջակցությամբ, օգոստոսի 28–ին կազմակերպել էր սեմինար–քննարկում « ՀՀ տնտեսության մարտահրավերները և հակամենաշնորհային քաղաքականության անհրաժեշտությունը» թեմայով, որի շրջանակներում ներկայացվել է «Պոլիտէկոնոմիայի» կողմից մշակված ՀՀ հակամենաշնորհային կարգավորման մասին օրենքի նախագիծը։

Հետազոտական ինստիտուտի հետ համագործակցել է ԱԺ ՀՅԴ խմբակցությունն ի դեմս պատգամավոր  Արծվիկ Մինասյանի, ով հանդիսանում է օրենքի նախագծի համահեղինակներից։

Նախագծման աշխատանքային խմբի ղեկավար, «Պոլիտէկոնոմիա» ՀԿ նախագահ Անդրանիկ Թևանյանը քննարկման ընթացքում ներկայացրել է սույն օրենքի ընդունման անհրաժեշտությունը և՛ քաղաքական, և՛ տնտեսական, և՛ օրենսդրաիրավական առումներով։

Նախագծման աշխատանքներն իրականացնող փորձագետներ Էդվարդ Սաֆարյանն ու Արմինե Բաբայանը քննարկման մասնակիցներին ներկայացրել են տվյալ ոլորտի միջազգային փորձի մի շարք ասպեկտներ, ինչպես նաև օրենքի նախագծում տեղ գտած հիմնական սկզբունքներն ու մոտեցումները։

Քննարկմանը մասնակցել են ԱԺ խմբակցության անդամներ, փորձագետներ, ինչպես նաև հասարակական սեկտորի ներկայացուցիչներ։

Օրենքի նախագծի մշակման աշխատանքային խումբը, հաշվի առնելով հնչեցված առաջարկներն ու դիտողությունները, առաջիկայում կներկայացնի օրինագծի նորացված տարբերակը, որն այնուհետև կներկայացվի ԱԺ դատին։

7or.am