Արգենտինայի ֆուտբոլի առաջնության երրորդ խմբի «Տիրո Ֆեդերալ դե լա Ռոխա» թիմի ավագ Ֆրանկո Անտոնիո Նիետոն աղյուսով գլխին ստացած վնասվածքից երեկ մահացել է հիվանդանոցում։ Այս մասին հայտնում է «Times Live»–ը։

Ողբերգական միջադեպը տեղի է ունեցել մարզադաշտի մոտակայքում՝ «Տիրո Ֆեդերալ դե լա Ռոխա»-«Չակարտիա» հանդիպումից հետո, որն անկարգությունների պատճառով խաղավարտից 15 րոպե առաջ դադարեցվել էր։

Ֆրանկո Անտոնիո Նիետոն սեփական ավտոմեքենայով պատրաստվում էր հեռանալ մարզադաշտի տարածքից։ Սակայն այդ պահին նրա վրա հարձակվել է երկրպագուների խումբը։ Նրանցից մեկը աղյուսով մի քանի անգամ հարվածել է ֆուտբոլիստի գլխին։

Չնայած բժիշկների բոլոր ջանքերին՝ Անտոնիոյի կյանքը փրկել չի հաջողվել։