Սանկտ Պետերբուրգի պետական համալսարանի գիտնականները մի շարք ուսումնասիրությունների արդյունքում հայտնաբերել են, որ կենգուրուները, ինչպես և մարդիկ, տարբեր առօրյա խնդիրներ լուծելու համար նախընտրում են օգտագործել վերին վերջույթներից մեկը:

«Вести. ru»-ի փոխանցմամբ` ուսումնասիրությունների ընթացքում գիտնականները նկատել են, որ, ի տարբերություն մարդու, գրեթե բոլոր կենգուրուները ձախլիկ են:

Այդ եզրակացությունը հնարավորություն է տվել գիտնականներին վիճարկելու այն տարածված թեզը, որ ձախլիկությունը հազվադեպ հանդիպող երևույթ է կաթնասունների շրջանում:

Նշվում է, որ կենգուրուի թաթերը հանգիստ կարելի է ձեռքեր անվանել, քանի որ այդ կենդանիների 5-մատանոց վերին վերջույթները շատ նման են մարդու ձեռքերին, միայն թե եղունգների փոխարեն մատների վրա երկար ճանկեր են:

«Մենք հաստատեցինք այն փաստը, որ նույնիսկ կենգուրուի ձագերն են անհամաչափ օգտագործում ձեռքերը. ձագուկը կախվում է մոր պարկից և ձախ ձեռքով քաղում խոտը»,–պատմել է ուսումնասիրության հեղինակներից մեկը՝ դոցենտ Եգոր Մալաշիչևը:

7or.am