Լրագրողների հետ հանդիպման ժամանակ Խոսքի ազատության պաշտպանության կոմիտեի նախագահ Աշոտ Մելիքյանը հայտնել է, որ այս տարվա երրորդ եռամսյակում ԶԼՄ ոլորտին վերաբերող օրենքներ կամ օրենքներում փոփոխություններ չեն ընդունվել։

-Համաձայն ««Հեռուստատեսության և ռադիոյի մասին» ՀՀ օրենքում փոփոխություններ կատարելու մասին» ՀՀ օրենքի՝ Հեռուստատեսության և ռադիոյի ազգային հանձնաժողովը 2010թ. հուլիսի 20-ին և 27-ին հայտարարեց ՀՀ տարածքում թվային հեռարձակման ցանցի միջոցով եթերային հեռարձակում իրականացնելու հեռուստահեռարձակողների լիցենզավորման մրցույթները։ Ընդհանուր առմամբ հայտարարվել է 25 մրցույթ։ Իսկ դրանից հետո ՀՀ նախագահը, հաշվի առնելով ««Հեռուստատեսության և ռադիոյի մասին» օրենքի շուրջ ընթացող ակտիվ քննարկումները, ինչպես նաև քաղաքական գործիչների և հասարակական կազմակերպություննների հնչեցրած կարծիքները, առաջարկել է ՀՀ մարդու իրավունքների պաշտպանի ղեկավարությամբ ստեղծել համապատասխան աշխատանքային խումբ՝ հեռարձակման թվայնացման գործընթացի օրենսդրական կարգավորման աշխատանքներն ավարտին հասցնելու նպատակով,-նշել  է նա։

Ըստ Աշոտ Մելիքյանի՝ Խոսքի ազատության պաշտպանության կոմիտեն որոշել է չմասնակցել այդ աշխատանքային խմբի աշխատանքներին, քանի որ արդեն ունի իր աշխատանքային խումբը։

-Մենք անց ենք կացրել մի շարք քննարկումներ, կատարել ենք նախնական ուսումնասիրություններ և պատրաստում ենք առաջարկություններ, որոնք ներկայացվելու են նաև պետական իրավասու մարմիններին՝ այդ թվում և ՀՀ մարդու իրավունքների պաշտպանին,-նշել է նա։

7or.am