ԱՊՀ երկրները հանդես են գալիս Լեռնային Ղարաբաղի հակամարտության խաղաղ կարգավորման եւ տարածաշրջանում մարտական գործողությունների վերսկսում թույլ չտալու օգտին:

Բելառուսի մայրաքաղաք Մինսկում այս մասին հայտարարել է ԱՊՀ գործադիր կոմիտեի նախագահ Սերգեյ Լեբեդեւը:

«Լեռնային Ղարաբաղի, Հայաստանի եւ Ադրբեջանի հարաբերությունների վիճակը հուզում է համագործակցության երկրների բոլոր ներկայացուցիչներին»,-նշել է նա:

Լեբեդեւի խոսքով՝ ԱՊՀ-ում «անկեղծորեն ցանկանում են, որ Լեռնային Ղարաբաղի տարածաշրջանում լարվածությունը վերանա»:

«Եվ որ երկու հարեւան պետությունները՝ Հայաստանը եւ Ադրբեջանը, փոխզիջումային լուծում գտնեն, որպեսզի ոչ մի դեպքում թույլ չտրվի մարտական գործողությունների վերսկսում, եւ որ երկխոսություն սկսվի բոլորին հուզող այդ հիմնախնդրի խաղաղ լուծում գտնելու շուրջ»,-նշել է նա:

ԱՊՀ գործկոմի ղեկավարը հուսով է, որ «այդ ցանկությունները հաշվի կառնվեն, եւ որ ԱՊՀ-ի երկրների եւ ԵԱՀԿ-ի Մինսկի խմբի հավաքական ջանքերը կբերեն դրական լուծման»:

«Մենք անկեղծորեն խաղաղություն եւ բարեկեցություն ենք ցանկանում Հարավային Կովկասում»,-հավելել է նա:

artsakhpress.am