Եկամտային հարկի փոփոխություններով պայմանավորված ցածր եկամուտներ ստացողների համար հարկային բեռը համեմատաբար թեթևանալու է, իսկ բարձր եկամուտներ ունեցողների պարագայում՝ հարկային բեռը կծանրանա: Այս մասին, այսօր՝ հունիսի 6-ին, լրագրողների հետ հանդիպմանն ասել է տնտեսագետ Կառլեն Խաչատրյանը:

Կառավարությունն Ազգային ժողով է ուղարկել հարկային նոր օրենսգրքի նախագիծը, որն ուժի մեջ է մտնելու 2018-ից:

Ներկայիս օրենքով մինչև 120 հազար դրամ եկամուտ ունեցողները հարկվում են 24.4 %-ով, 120 հազարից 2 մլն եկամուտ ունեցողները 26 % են վճարում, իսկ 2 միլիոնից ավելի եկամուտ ունեցողները հարկվում են 36%-ով: Հարկային օրենսգրքի առաջարկվող նախագծով եկամտային հարկը մինչև 120 հազար դրամ ստացողների համար դառնալու է 23 % (այժմ՝ 24.4 % է), երկրորդ հատվածի շեմը իջեցվելու է՝ 120 հազարից 1 մլն դրամ (ներկայիս օրենքով 120-ից 2 մլն է) և այն դառնալու է 28 % (26 %): 1 միլիոնից ավելի եկամուտ ունեցողների համար հարկման դրույքաչափը կդառնա 33 %, իսկ 2 միլիոնից ավելի եկամուտ ունեցողների դեպքում դրույքաչափն իջնելու է 36-ից՝ 33 %-ի:

-Եթե զուտ թվային հաշվարկ իրականացնենք, ապա մինչև 200 հազար դրամ եկամուտ ունեցողների պարագայում հարկային բեռը կթեթևանա, իսկ 200 հազար դրամից ավելի աշխատանքային եկամուտ ստացողների պարագայում՝ հակառակը,-նշել է Կ. Խաչատրյանը:

Օրինակ՝ 2.5 մլն եկամուտ ունեցողը ներկայիս օրենքով հարկվում է 698 հազար դրամով, իսկ նոր օրենքով՝ պետք է հարկվի 769 հազար դրամով:

Մանրամասները՝ Vesti.am-ի տեսանյութում: