ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ԼՂ հակամարտության շուրջ բանակցություններում որևէ տհաճ անակնկալ չի կարող լինել: Այսպես նա արձագանքել է հարցին, թե մտահոգություններ չկա՞ն, որ բանակցությունների մանամասների մասին տեղեկատվության բացակայությունը հետագայում կարող է տհաճ անակնկալ լինել հակամարտող կողմերի հասարակությունների համար:

«Բանակցային գործընթացում ներառված են փորձագետներ բոլոր կողմերից: Դա այն է, ինչը մաքոքյան դիվանագիտություն է կոչվում»,-ասել է Զախարովան՝ հավելելով, որ մտահոգություն պետք է առաջացնի պայմանավորվածությունների բացակայությունը:

«Կարևոր է, որ ներկայում ակտիվորեն ընթացող գործընթացը կառուցողական ավարտ ունենա, և կողմերին տարածաշրջանում խաղաղության հույս բերի: Այժմ շատ կարևոր պահ է, և պետք է այնպես անել, որ բոլոր թիմերն ընդհանուր արդյունքի համար խաղան, մասնավորապես՝ բռնության դադարեցման, նոր արյունահեղության պոտենցիալ հնարավորությունների կանխման»,-նշել է ՌԴ ԱԳՆ ներկայացուցիչը:

7or.am