Բաստիլի օրը նշելու համար Նիսի Անգլիական լողափում հավաքված մարդկանց ամբոխի մեջ բեռնատար ավտոմեքենա է մխրճտվել։ Այնուհետև ավտոմեքենայից կրակ են բացել մարդկանց վրա: Զոհվել է առնվազն 80, վիրավորվել՝ ավելի քան 120 մարդ: Այս մասին հայտնում է տեղի ԶԼՄ–ն։

Բեռնատարն ամբոխի միջով անցել է երկու կիլոմետր, մինչև ոստիկանությունը վնասազերծել է վարորդին:

Ֆրանսիայի նախագահ Ֆրանսուա Օլանդն էլ հայտնել է, որ առնվազն 77 մարդ է զոհվել հարձակման հետևանքով:

«Բեռնատարի վարորդի նպատակն էր մարդկանց սպանելը, ճզմելն ու ոչնչացնելը: Ներկայում կարելի է ասել 77 զոհի մասին. նրանց թվում շատ են երեխաները: Մոտ 20 մարդ ծայրահեղ ծանր վիճակում է: Չի կարելի բացառել այս հարձակման ահաբեկչական բնույթը»,-ասել է նա:

Օլանդի որոշմամբ՝ հուլիսի 26-ին ավարտվող արտակարգ դրության ռեժիմը կերկարաձգվի երեք ամսով:

Ըստ որոշ տեղեկությունների՝ զոհերի թվում նաև հայ կին կա։

***

ՀՀ ԱԳՆ ֆեյսբուքյան պաշտոնական էջում գրառում է կատարվել. «Ճշտում ենք Նիսում ահաբեկչության հետևանքով զոհվածների և տուժածների շրջանում հայերի առկայությունը։ Հաստատված տեղեկություններ դեռ չկան»։

***

ԱՄՆ նախագահ Բարաք Օբաման Նիսում տեղի ունեցած ահաբեկչությունից հետո հրատապ հայտարարությամբ է հանդես եկել։ Օբաման կատրավածը սարսափելի հանցագործություն է անվանել:

***

ՀՀ ԱԳՆ–ն պաշտոնապես հաստատեց՝ Նիսում ահաբեկչության հետևանքով զոհվել է ՀՀ քաղաքացի։

«Մանրամասները ճշտվում են։ Մարսելում ՀՀ գլխավոր հյուպատոսությունը կապի մեջ է զոհվածի հարազատների հետ՝ անհրաժեշտ օժանդակություն ցուցաբերելու համար»,–հայտնում են ԱԳՆ–ից։

***

Լեռնային Ղարաբաղի Հանրապետության արտաքին գործերի նախարարությունն իր ցավակցություններն է հայտնել Ֆրանսիայի ժողովրդին հուլիսի 14-ին Նիսում տեղի ունեցած ահաբեկչության առնչությամբ:

Երևանում վաղ առավոտից ծաղիկներ են դնում ՀՀ-ում Ֆրանսիայի դեսպանատան առջեւ՝ հարգանքի տուրք մատուցելով ահաբեկչության զոհերին:

***

Վերջին տվյալներով՝ զոհվել է 84 մարդ, ավելի քան 18-ի վիճակը ծայրահեղ ծանր է։

***

Ֆրանսիայում 3-օրյա սուգ է հայտարարվել։ Պետական գերատեսչություններում կիջեցվեն դրոշները։

***

ՀՀ ԱԳՆ–ն տեղեկացնում է, որ Նիսում ևս մեկ ՀՀ քաղաքացի է զոհվել։

***

Ֆրանսիայի նախագահ Ֆրանսուա Օլանդը, վարչապետ Մանուել Վալսը և ՆԳՆ ղեկավար Բերնար Քազնևը ժամանել են Նիս։

***

Համացանցում են հայտնվել ահաբեկչին ոչնչացնելու կադրերը։ Հանցագործի վրա կրակ են բացել առջևի ապակու միջով։ Ընդ որում, բեռնատարի կապոտին կին ոստիկան է թռել։

Թունիսի ՆԳՆ–ից արդեն հաստատել են վարորդի ինքնությունը. նա 31-ամյա Մոհամմեդ Բուհլելն է՝ երկրի հարավում գտնվող Մսաքեն քաղաքից։

7or.am