Մոսկվան և Տոկիոն վիճում են Կուրիլյան կղզիներ Մեդվեդևի կատարած այցի պատճառով։ Դմիտրի Մեդվեդևի այցի հիմնական նպատակը բնակիչների տնտեսական իրավիճակի բարելավումն է։

ՌԴ ԱԳ նախարար Սերգեյ Լավրովն անընդունելի է համարել Հարավային Կուրիլներ Դմիտրի Մեդվեդևի կատարած այցի վերաբերյալ ճապոնական իշխանությունների արձագանքը, ովքեր բողոք են ներկայացրել Տոկիոյում Ռուսաստանի դեսպանին։

Նախարարի խոսքերով՝ այսօր Տոկիոյում Ռուսաստանի դեսպանին զրույցի համար կհրավիրեն Սմոլենսկի հրապարակ։

-Մենք չենք պատրաստվում քայլեր ձեռնարկել, որոնք կդժվարացնեն ռուս-ճապոնական համագործակցությունը, սակայն ճապոնական կողմը պետք է հետևություններ անի,-ասել է Լավրովը։

Ավելի վաղ Ճապոնիայի ԱԳ նախարար Սեյձի Մայեխարան կանչել էր Տոկիոյում Ռուսաստանի դեսպանի Միխայիլ Բելիին և բողոք էր ներկայացրել Քունաշիր կղզի Դ. Մեդվեդևի այցի կապակցությամբ։

Ճապոնիայի վարչապետ Նաոտո Կանը հայտարարել է, թե Մեդվեդևի գործողությունները «ափսոսանքի են արժանի»։

Մեդվեդևի այցի կապակցությամբ Հոկայդո կղզում բողոքի գործողություն է տեղի ունեցել։

Ի պատասխան Ռուսաստանի ԱԳ նախարարը նշել է, թե Ռուսաստանի նախագահն ազատ է այցելել երկրի ցանկացած շրջան։

-Ճապոնական կողմի արձագանքն անընդունելի է։ Դա մեր հողն է, և ռուս նախագահն այցելել է ռուսական հողեր,-ընդգծել է Լավրովը։

Մեդվեդևն առաջին ռուս առաջնորդն է, որ այցելել է վիճելի տարածքներ։ Քունաշիր կղզում նա հանդիպել է տեղի բնակիչներին, ծանոթացել է շինարարական հրապարակներին և եղել է ձկնաբուծարանում։

-Հյուսիսային այդ չորս կղզիները մեր երկրի մասն են կազմում, այդ իսկ պատճառով ՌԴ նախագահի այցն այնտեղ ծայրահեղ ափսոսանք է առաջացնում,-ասել է Ճապոնիայի վարչապետը։

Իսկ Ճապոնիայի ԱԳ նախարարն ավելացրել է, որ այդ այցը վիրավորում է ճապոնացիների զգացմունքները։

Ըստ «BBC Russian»-ի