Սիրելի՛ ուսանողներ,

նոյեմբերի 17-ին աշխարհի բազմաթիվ երկրներում նշվում է Ուսանողության միջազգային օրը, ինչը ևս մեկ առիթ է ընդգծելու երիտասարդության ներուժն առավել նպատակային ու արդյունավետ օգտագործելու կարևորությունը: Չկա մի ոլորտ, որում առկա հիմնահարցերն այս կամ այն կերպ չառնչվեն երիտասարդության ու, մասնավորապես, ուսանողության հետ: Իրականում այս օրը հսկայական խորհուրդ ունի: 1939թ. այս օրը նացիստները Չեխոսլովակիայում Պրահայի, Բռնոյի և մի շարք այլ ուսանողական քաղաքների հանրակացարաններում հատուկ գործողություն սկսեցին: Նոյեմբերի 17-ի առավոտյան նացիստները շրջապափակեցին ուսանողական հանրակացարանները և ձերբակալեցին հազարավոր ուսանողների: Բանն այն է, որ այդ օրերին ուսանողները դուրս էին եկել փողոցներ՝ պայքարելու իրենց երկրի անկախության համար, որը գտնվում էր նացիստական օկուպացիայի ներքո: Նոյեմբերի 17-ի գործողության արդյունքում մոտ 1200 ուսանող տեղափոխվում է Զաքսենհաուզենի համակենտրոնացման ճամբար, իսկ ուսանողական ընդվզումների կազմակերպիչներից շուրջ 12 ուսանող մահապատժի է ենթարկվում: Հետագայում 1941թ. նացիզմի դեմ կռվող ուսանողները Լոնդոնում, ի հիշատակ սպանված չեխ ուսանողների, նոյեմբերի 17-ը հռչակում են ուսանողության միջազգային օր:

Առանց ուսանողների մասնակցության, առանց նրանց ուժի ու եռանդի՝ անհնար կլինի արդյունավետ լուծում տալ պետության առաջ ծառացած շատ խնդիրների։

ՀԱՄԱԽՄԲՈՒՄ կուսակցության երիտասարդական խորհրդի անդամ Աղվան Պողոսյանի ֆեյսբուքյան էջից