Թուրք մարդասպան ոստիկան Մևլութ Մերթ Ալթընթաշը Թուրքիայիում ՌԴ դեսպան Անդրեյ Կառլովի վրա հարձակումը ծրագրել ու նախագծել էր Ժամանակակից արվեստի կենտրոնի՝ դեպքի վայրի մոտակայքում գտնվող հյուրանոցում։ Այս մասին հայտնում է թուրքական «haber7.com»–ը։

Ողբերգության օրը նա, բժշկական թուղթ ներկայացնելով, չի գնացել աշխատանքի և սենյակ է վարձել այդ հյուրանոցում։

Այնուհետև Ալթընթաշը սափրվել է, հագել աշխատանքային համազգեստն ու փողկապ կապել: Արվեստի կենտրոնի մուտքի մոտ ցույց տալով իր ոստիկան լինելը հաստատող փաստաթուղթը՝ նա ներս է մտել։ Կանգնելով դեսպանի ուղիղ հետևում՝ նախ նա օդ է կրակել, այնուհետև մեջքից վիրավորել Կառլովին։

Ողբերգական դեպքի մասին համացանցում ևս մի տեսանյութ է հայտնվել, որտեղ երևում է, թե ինչպես է մարդասպանը պատրաստվում հարձակվել ՌԴ դեսպան վրա։ Այն ֆեյսբուքյան իր էջում հրապարակել է ռուսական НТВ հեռուստաալիքը։

Մարդասպանը մասնակցել է նաև ՌԴ դեսպանատան պահպանությանը Հալեպի ազատագրումից հետո Թուրքիայում սկիզբ առած հակառուսական ցույցերին, ինչպես նաև ընդգրկված է եղել 2014 և 2015թթ. Թուրքիայի նախագահ Ռեջեփ Թայիփ Էրդողանի անվտանգությունն ապահովող ոստիկանական թիմում. այդ մասին փոխանցում է թուրքական« t24.com.tr»–ն։

7or.am