Սերժ Սարգսյանի երեկվա հայտարարությունը մի բան է վկայում՝ նա չի ուզում՝ որևէ մեկը երկիրը կառավարի, բացի իրենից: «Միայն ես ու ես» կարգախոսով առաջնորդվող Ս. Սարգսյանը չի պատրաստվում հիմա և երբևէ աթոռը զիջել որևէ մեկին, և եթե պետք լինի արդեն վարչապետի պաշտոնից հրաժարվել, նա ձեռքերը ծալած չի նստի. կկառուցի այնպիսի քաղաքական համակարգ, ասենք՝ նորից Սահամանադրություն կփոխի՝ այս անգամ ԱԺ նախագահին կվերապահվի երկիրը կառավարելու այդ անձեռնմխելի պաշտոնը, և հավատացեք, որ նա դա էլ կանի: «Ինձնից հետո թեկուզ ջրհեղեղ» սիրող նախագահ Սարգսյանը ցանկացած ձևաչափով ուզում է երկիր կառավարել ու իր լիազորությունների շրջանակը մեծացնել:

Իր երեկվա հայտարարությունը, որ 2018թ-ից հետո հանրապետության վարչապետի լիազորություններն ու հնարավորություններն ազգային անվտանգության և պաշտպանության առումով լինելու են շատ ավելի լայն, քան այն, ինչ կիսանախագահական համակարգի պայմաններում, վերապահված է այսօրվա նախագահին՝ գերագույն գլխավոր հրամանատարին, վկայում է նաև այն մասին, որ նա իր պաշտոնը գնալով կատարելագործում է՝ լիազորությունների շրջանակը լայնացնելով:

Փաստրեն, նա հասկացնում է, որ չկա «ժառանգորդ», չկա վստահելի քաղաքական գործիչ, ով Սերժ Սարգսյանի խոսքն առաջ կտանի, ով կսպասարկի անձնապես իր շահերը:

Սա նշանակում է նաև, որ ինչպես հիմա, այնպես էլ հետո նա միանձնյա է որոշումներ կայացնելու, միանձնյա է նշանակումներ անելու, և ինքն է որոշելու՝ երկիրն ինչ ուղղությամբ է գնալու: Նրա լիազորությունները կրկնապատկվելու են, և այս անգամ նա այլևս չի մտածելու՝ վարչապետի պաշտոնն ում վստահել, ում՝ ոչ. Սերժ Սարգսյանն ինքն իրեն է միայն վստահում:

Սաթեն Մանասյանի ֆեյսբուքյան էջից