Հայտնի երգիչ Թիմաթին, որի համերգը նախատեսված էր երեկ Երևանում, այդպես էլ բեմ դուրս չեկավ: Ավելի ուշ նա բացատրեց իր այդ քայլի պատճառը: Այս մասին հայտնում է armeniasputnik-ը։

Թիմաթին տեսանյութ է հրապարակել Ինստագրամում՝ բացատրելով, թե ինչու նախօրեին կայացած համերգին ինքը ելույթ չունեցավ:

«Երկու ժամվա սպասման հետևանքով, սնուցման վառված բլոկերի և ջրով լցված երաժշտական քարտերի պատճառով իմ ելույթը չկայացավ: Մենք տեղափոխում ենք համերգը, որի մասին կհայտարարենք հաջորդ շաբաթ»,- նշել է Թիմաթին:

Նա հանդիսատեսին հորդորել է պահպանել իրենց տոմսերը: «Ամբողջ թիմի անունից հայցում եմ ձեր ներողամտությունը այս միջադեպի համար, որը մեզանից կախված չէր»,-ասել է ռեփերը։

Թիմաթին մայիսի 12-ին պետք է ելույթ ունենար Երևանում, Կարեն Դեմիրճյանի անվան մարզահամերգային համալիրում Քրիստինա Սի-Սարկիսյանի, L'ONE-ի և MOT-ի հետ: Բայց հանդիսատեսն այդպես էլ բեմում չտեսավ Թիմաթիին: Երբ կազակերպիչներն, ի վերջո, տեղեկացրին, որ ինչ-ինչ պատճառներով Թիմաթին չի կարող երգել, երկրպագուները սկսեցին շշեր նետել բեմ: