Ամերիկյան հայտնի պարբերական «New York Times»-ն անդրադարձել է ԱՄՆ-ում Դոնալդ Թրամփի և Թուրքիայի նախագահ Ռեջեփ Թայիփ Էրդողանի միջև կայացած հանդիպմանը:

Թուրքական ընդդիմադիր «Diken» պարբերականը, հղում անելով «New York Times»-ի հոդվածին, նշում է, որ այդ հանդիպումից Էրդողանը Թրամփից չստացավ այն, ինչ ցանկանում էր. փոխանցում է «ermenihaber.am»–ը։

Նշվում է, որ կողմերը համաձայնության չեն եկել մի շարք հարցերում հենց Էրդողանի պահանջների պատճառով, որոնք, թերթի գնահատմամբ, անտրամաբանական են:

Մասնավորապես, նկատի է առնվում Էրդողանի այն պահանջը, որ Թրամփը հետ կանգնի Սիրիայի քրդերին զինելու որոշումից, ինչպես նաև, որ ամերիկաբնակ միլիարդատեր, իսլամի քարոզիչ Ֆեթթուլլահ Գյուլենն արտահանձնվի Թուրքիային, ով մեղադրվում է ռազմական հեղաշրջման փորձի կազմակերպման մեջ:

Վերջինիս հետ կապված ասվում է, որ ԱՄՆ-ը չի կարող առանց դատարանի որոշման արտահանձնել Գյուլենին: Եվ, բացի այդ, Թուրքիան մինչև հիմա ամերիկյան կողմին չի ներկայացրել գեթ մեկ հստակ ապացույց, որով հիմքեր կստեղծվեն Գյուլենի արտահանձնման համար:

Բացի դրանից, հոդվածում հիշատակվում է Վաշինգտոնում Թուրքիայի դեսպանատան առջև Էրդողանի թիկնապահների հարձակումը՝ հակաէրդողանականների դեմ, որոնք բողոքի ակցիա էին կազմակերպել այնտեղ: Եվ այդ առումով քննադատության է ենթարկվում հենց Թրամփը:

«Այդ ընթացքում Թրամփն անտարբեր մնաց, երբ իր ժողովրդի դեմ Էրդողանը ճնշում գործադրեց»,-գրում է թերթը։