ԵԱՀԿ Մինսկի խմբի համանախագահները ԵԱՀԿ պաշտոնական կայքում հայտարարություն են տարածել, որում ԼՂ հակամարտության կողմերին կոչ են անում անհապաղ դադարեցնել ռազմական գործողությունները:

Նշվում է, որ համանախագահները տեղեկատվություն են ստացել հուլիսի 4-ին ուշ երեկոյան Ֆիզուլիի շրջանի Ալխանլի գյուղում տեղի ունեցած նոր բախումների մասին, որոնց հետևանքով եղել են զոհեր, այդ թվում՝ քաղաքացիականների շրջանում:

«ԵԱՀԿ Մինսկի խմբի համանախագահները կողմերին կոչ են անում անհապաղ դադարեցնել ռազմական գործողությունները։ Բռնությունը միայն նոր բռնություններ է հրահրում և ոչ մի արդյունքի չի հանգեցնում: Այս երկարաժամկետ հակամարտության հանգուցալուծման միակ պատասխանատու և մարդկային տարբերակը վերադարձն է բանակցությունների սեղանի շուրջ»,- հայտարարել են Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ):

Նրանք նաև ցավակցություն են հայտնել զոհերի հարազատներին:

7or.am