Այսօր մամուլում լուրեր են տարածվել, որ ՀՀ նախագահ Սերժ Սարգսյանը մոտ ապագայում մտադիր է «թարմացնել» նախարարների կաբինետը։  Խոսքը մասնավորապես 7 նախարարների պաշտոնանկ անելու մասին է, այդ թվում՝ Սպորտի և երիտասարդության հարցերի նախարար Արմեն Գրիգորյանի, Սփյուռքի նախարար Հրանուշ Հակոբյանի, ոստիկանապետ Ալիկ Սարգսյանի և Ազգային անվտանգության ծառայության պետ Գորիկ Հակոբյանի։

«7օր»-ի թղթակցի հետ զրույցում, սակայն, նշված կառույցների մամուլի ծառայություններից հերքել են այդ տեղեկությունը։

Մասնավորապես Սփյուռքի նախարարության մամուլի վարչության պետ Թևոս Ներսիսյանն ասել է.

-Կլյաուզա է եղել. այդպիսի խոսակցություն ընդհանրապես չկա։

Սպորտի և երիտասարդության հարցերի նախարարության տեղեկատվական բաժնի պետ Կարինե Եսայանն էլ նշել է, որ պաշտոնապես որևէ տեղեկություն չունի։

-Ընդհա՛նրապես չի համապատասխանում իրականությանը,- վերոնշյալ տեղեկությունները հերքել է նաև ԱԱԾ լրատվության և հասարակայնության հետ կապերի վարչության պետ Արծվին Բաղրամյանը։

ՀՀ ոստիկանության լրատվության և հասարակայնության հետ կապերի վարչության պետի տեղակալ Մուշեղ Կրոյանն էլ «7օր»-ին ասել է, որ ոստիկանապետը պաշտոնանկ չի արվել.

-Ոստիկանապետը տեղում աշխատում է,- հաստատել է նա։

Մի շարք նախարարների պաշտոնանկ անելու մասին տեղեկություն չունեին նաև ՀՀ կառավարության մամուլի ծառայությունում։ Վարչապետ Տիգրան Սարգսյանի խորհրդական Արամ Անանյանն էլ «7օր»-ին ասել է, որ պաշտոնական որևէ տեղեկություն չկա։

ՀՀ նախագահի մամլո խոսնակ Սամվել Ֆարմանյանը «7օր»-ին փոխանցել է, որ բացի  Սպորտի և երիտասարդության հարցերի նախարար Արմեն Գրիգորյանից, մնացած նախարարների մասով տարածված լուրերը իրականությանը չեն համապատասխանում։

Ի դեպ, նշենք, որ «Բարգավաճ Հայաստան» կուսակցության նախագահ Գագիկ Ծառուկյանի մամուլի խոսնակ Խաչիկ Գալստյանն արդեն ասել է, որ Հայաստանի սպորտի և երիտասարդության հարցերի նախարար Արմեն Գրիգորյանը հրաժարական է ներկայացրել ծանրաբեռնվածության պատճառով, իսկ ԲՀԿ-ն, որպես նոր նախարարի թեկնածու, առաջարկել է Աշխատանքի տեսչության պետ Արթուր Պետրոսյանին։

7or.am