Այսօր՝ ժամը 10:00֊ին, «Մարիոթ» հյուրանոցում տեղի կունենան Նիկոլ Փաշինյանի և Սերժ Սարգսյանի բանակցությունները։

Ինչպես նախօրեին հանրահավաքից հետո հայտնել էր Փաշինյանը, Սերժ Սարգսյանը պատրաստ է քննարկել իր առաջարկած օրակարգը։

Փաշինյանը նշել էր, որ իրենք բանակցելու են Սերժ Սարգսյանի հրաժարականի և իշխանության անցնում փոխանցման պայմանների շուրջ։

Իսկ բողոքի այսօրվա գործողությունները թեև սկսվելու էին Էրեբունի համայնքից՝ ժամը 12։00-12։30, սակայն վաղ առավոտից արդեն Հանրապետության հրապարակում ցուցարարներն ինքնաբուխ կերպով հավաքվում են։

***

Նիկոլ Փաշինյանի և Սերժ Սարգսյանի հանդիպումը տևել է մի քանի րոպե․ Սարգսյանը կեսից հեռացել է:

***

Սերժ Սարգսյանի հետ հանդիպումից մեկ ժամ հետո Նիկոլ Փաշինյանն ու հազարավոր քաղաքացիներ երթ էին իրականացնում Էրեբունի համայնքում։ Արցախի փողոցում նրանց ճանապարհը փակեցին վահաններով զինված ոստիկանները, և անսպասելի կերպով մտնելով քաղաքացիների մեջ՝ մեծ դժվարությամբ բերման ենթարկեցին Նիկոլ Փաշինյանին։ Ոստիկանությունը նաև հատուկ միջոցներ կիրառեց։

Պատգամավոր Սասուն Միքայելյանը քաղաքացիներին կոչ արեց մնալ այնտեղ, իսկ մնացած բոլորին՝ դուրս գալ փողոց։

***

Հենց նոր բերման ենթարկվեցին նաև Սասուն Միքայելյանը և բազմաթիվ այլ քաղաքացիներ։ Տեղեկություններ կան, որ բերման է ենթարկվել նաև Արարատ Միրզոյանը։

***

Հանրապետության հրապարակում տեղի ունեցավ այս օրերի ամենաբազմամարդ հանրահավաքը։

7or.am