-Ես համոզված եմ, որ երբ բանը հասնի մեր խորհրդարանի քվեարկությանը, ապա ամեն ինչ կլինի այնպես, ինչպես բոլորս գիտենք։ Քվերակությունը լինելու է պարտադրական իշխանության մեջ եղած քաղաքական ուժերի պատգամավորների համար,- Հայաստանի խորհրդարանի կողմից արձանագրությունների վավերացման մասին խոսելիս ասել է Տիգրան Թորոսյանը։

Նա նշել է, որ պատգամավորն ազատ է իր դիրքորոշումն արտահայտելու մեջ, և դա սահմանադրորեն սահմանված կարգ է. պատգամավորը չպետք է հրամայական մանդատով կաշկանդված լինի։ Այս առումով Տիգրան Թորոսյանը նշել է, թե ճիշտ չէր նախագահի ելույթում օգտագործել ձևակերպումը, որ ՀՀ նախագահը, որպես քաղաքական մեծամասնության առաջնորդ, արձանագրությունները չվավերացնելը բացառում է։

Նա համոզված է, որ ոչ միայն Հանրապետական կուսակցության, այլև մյուս կուսակցությունների մեջ, որոնք աջակցում են հայ-թուրքական գործընթացին, ճնշող մեծամասնությունը, գոնե երբ  մենակ է, ինքն իրեն խոստովանում է, որ արձանագրությունները Հայաստանի համար շահեկան չեն։

Ինչ վերաբերում է անուններին, Տիգրան Թորոսյանն ասել է. «Քանի որ դրանք մի քանի հոգի չեն, այլ շատ շատերն են, իմաստ չունի անուններ տալ»։ 

7or.am