Այս պահին «Ոսկու աշխարհի» աշխատակիցները երթով շարժվում են դեպի ՀՀ կառավարության շենք։ Նրանց են միացել նաև «Մալաթիա» տոնավաճառի ոսկու շուկայի աշխատակիցները։ Վերջիններն արդեն 2 օր է՝ գործադուլ են հայտարարել։ Ցուցարարներից մեկը «7օր»-ին ասել է, որ թեև այս պահին բողոքի ակցիայի մասնակիցների թիվը 700 է, սակայն ամեն օր գործադուլավորների թիվն ավելանում է. իրենց շարքերն են համալրում նաև ոսկու մյուս տոնավաճառների, խանութների և կրպակների աշխատակիցները։ Նրանք բողոքում են կառավարության վարած քաղաքականությունից։

-Պահանջները հետևյալն են՝ վերականգնել հաստատագրված վճարները, հաշիվ-ապրանքագիր չպահանջել, ոսկու շուկայի համար գույքագրում չանել, տուգանքներն իջեցնել նախկինի չափ՝ 75 հազար դրամ (բարձրացրել են 150 հազարի),- «7օր»-ին ասել է ցուցարարներից մեկը։

Այսօր այս նույն պահանջներով ոսկու շուկայի աշխատակիցները նամակ են փոխանցելու ՀՀ վարչապետ Տիգրան Սարգսյանին։ Նույն նամակն ուղարկվելու է նաև Ազգային ժողով և Մարդու իրավունքների պաշտպանի գրասենյակ.

-Մեզ պատասխանում են, որ չեն փոխելու օրենքը, մենք էլ հայտարարում ենք, որ կանգնելու ենք մինչև վերջ։ Գործադուլը շարունակվելու է,- պնդել են ցուցարարները։

7or.am