Հարցազրույց

22.02.2010 19:09


Հովհաննես Սահակյան

Հովհաննես Սահակյան

Հարցազրույց Ազգային ժողովի ՀՀԿ խմբակցության պատգամավոր Հովհաննես Սահակյանի հետ

-Նախագահ Սերժ Սարգսյանը  Լոնդոնի «Չեթթըմ Հաուս» ինստիտուտում ասաց, որ եթե հաստատվեն մեր կասկածները, որ Թուրքիայի նպատակը ժամանակ ձգձգելն է և ոչ թե հարաբերություններ կարգավորելը, ապա ստիպված ենք լի­նելու դադարեցնել այս գործընթացը։ Սակայն այստեղ որոշ հանրապետական պատգամավորներ հայտարարեցին, թե հարկ եղած դեպքում մենք Թուրքիայի խորհրդարանից շուտ կվավերացնենք դրանք։ Ինչո՞վ է սա բացատրվում։

-Եղել է Սամվել Նիկոյանի հայտարարությունը, որը չի վերաբերել արձանագրությունների՝ Ազգային ժողովում վավերացմանը։ Ինքը բազմիցս պարզաբանել է այդ խնդիրը։ Հայտարարություն եղել է այն մասին, որ նախաձեռնողական այդ քաղաքականությունը, որ որդեգրել է Սերժ Սարգսյանը, այսօր էլ չպետք է թողնենք, և այս հարցը կարող է մտնել արտաքին հարաբերությունների մշտական հանձնաժողով, քննարկվել և սպասել. եթե Թուրքիան չվավերացնի, մենք չենք վավերացնի։

–Իսկ Ռաֆիկ Պետրոսյանի հայտարարությունը՞…

-Ռաֆիկ Պետրոսյանը միգուցե և անձնական կարծիք է հայտնել, ես չգիտեմ։ Բայց կարող եմ հավաստիացնել, որ Հայաստանի հանրապետական կուսակցության, ՀՀ նախագահ Սերժ Սարգսյանի որդեգրած կուրսն ընդունելի է մեր բոլորի՝ հանրապետականների համար, և այդ հարցերը մենք բազմիցս քննարկել ենք, խորհրդի նիստերի ժամանակ այդ հարցի մասին բազմիցս կարծիք ենք հայտնել, և որևէ տարակարծություն չի եղել։ Սամվել Նիկոյանի դեպքում դա եղել է լրագրողների թյուրըմբռնում, իսկ Ռաֆիկ Պետրոսյանը երևի իր անձնական կարծիքն է հայտնել, իր փոխարեն չեմ կարող մեկնաբանել։ Այն գաղափարը, որ եթե Թուրքիայի խորհրդարանը չվավերացնի ողջամիտ ժամկետներում, մենք հետ կկանգնենք, մինչև այսօր պահպանվում է, և այդպես էլ կլինի։

-Այնուամենայնիվ, եթե արձանագրությունները խորհրդարանում դրվեն քվեարկության, Դուք առանց վերապահումների դրանց «կողմ» կքվեարկե՞ք։

-Այդ վերապահումներին ես մի քիչ վերապահումով եմ մոտենում, որովհետև եթե միջազգային արձանագրությունները կամ պայմանագրերը վավերացվում են, և կետ կա, որ այս պայմանագրերը ենթակա են վավերացման կամ ընդունման, և եթե դրանց մեջ որևէ կետ փոխվում է, և դա երկուստեք չէ, ուրեմն պայմանագրերը չեղյալ են համարվում։ Եթե մենք ինչ-որ վերապահումներով ընդունենք դրանք, դա կնշանակի, որ մենք ի սկզբանե այս գործընթացը տապալում ենք։ Եվ երբ մենք այսօր Թուրքիային մեղադրում ենք, որ ինքը ձգձգում է, տապալում է, նաև միջազգային հանրության առջև պետք է պատասխանատվության ենթարկվի, մենք Թուրքիային տալիս ենք խաղաքարտ, որ ինքը օգտագործի մեր դեմ։ Ես դեմ եմ վերապահումներով վավերացնելուն, որովհետև գոնե մեր ներքին սպառման համար Սահմանադրական դատարանը տվեց հստակ ձևակերպում, իրավական մեկնաբանություններ, որպեսզի այլևս տարակարծության առիթ չլինի։ Իսկ մեր՝ հանրապետականների համար միջազգային պայմանագրերն ընդունելի են այն տեսքով, ինչ տեսքով որ կան, և այդպես էլ վավերացնելու ենք։

Զրույցը վարեց Սյուզի Մելքոնյանը

Այս խորագրի վերջին նյութերը