Ռումինիայի արտգործնախարար Թեոդորո Բանսկիի հետ համատեղ մամլո ասուլիսի ժամանակ Ադրբեջանի արտգործնախարար Էլմար Մամեդյարովն ասել է, թե որպեսզի ղարաբաղյան խնդիրը լուծվի, անհրաժեշտ է նախ «գրավյալ» տարածքներից հանել հայկական զորքերը և ադրբեջանցի փախստականներին էլ վերադարձնել իրենց տները։

Նրա խոսքերով՝ Բաքուն դեռ ԵԱՀԿ Մինսկի խմբի համանախագահներից պատասխան չի ստացել, թե Երևանն ինչպես է արձագանքել մադրիդյան սկզբունքների նորացված տարբերակին, որն առաջարկվել էր համանախագահողների կողմից։

-Ադրբեջանի տեսակետը հետևյալն է՝ եթե Հայաստանն ընդունի նորացված մադրիդյան սկզբունքները, ապա հնարավոր կլինի աշխատել խաղաղ համաձայնագրի շուրջ,-ասել է Մամեդյարովը։

Մեկնաբանելով ՀՀ արտգործնախարար Էդվարդ Նալբանդյանի այն հայտարարությունը, թե անհրաժեշտ է, որ Լեռնային Ղարաբաղի Հանրապետությունը ևս մասնակցություն ունենա բանակցություններին՝ Մամեդյարովն ասել է, թե ԵԱՀԿ-ի կողմից որոշակի որոշում կա Հայաստանի և Ադրբեջանի միջև բանակցային գործընթացի վերաբերյալ, և այս փուլում Լեռնային Ղարաբաղը չի կարող միանալ բանակցություններին։

Ինչ վերաբերում է ԼՂ-ի կարգավիճակին, ապա, Մամեդյարովի խոսքերով, դա հնարավոր է որոշել միայն «ադրբեջանական համայնքի» վերադարձից հետո։

-Թե ինչ կարգավիճակ է սպասվում Լեռնային Ղարաբաղին, կորոշվի բանակցությունների ուղիով,-ասել է նա։