Նախագահ Սերժ Սարգսյանը  սիրիական «Al Watan» թերթին տված հարցազրույցում ասել էր, թե երբ Ղարաբաղի ժողովուրդը ստանա ինքնորոշման իր իրավունքն իրագործելու իրական հնարավորություն, և ստեղծվեն անվտանգության ու զարգացման գործնական մեխանիզմներ, հայկական կողմի փոխզիջում կարող է դիտվել Ղարաբաղի շուրջը գտնվող այդ շրջանների վերադարձն Ադրբեջանին՝ իհարկե պահպանելով ԼՂ-ն ու Հայաստանը կապող միջանցքը։

«7օր»-ի հետ զրույցում մեկնաբանելով սա՝ «Ժառանգություն» կուսակցության վարչության նախագահ Արմեն Մարտիրոսյանն ասել է, թե ճիշտ չէ խառնվել այլ երկրի ներքին գործերին։

-Լեռնային Ղարաբաղի Հանրապետությունը կայացած անկախ պետություն է, և ազատագրված բոլոր տարածքները ԼՂՀ սահմանադրությամբ պատկանում են ԼՂՀ-ին։ Եվ որևէ մեկը իրավունք չունի բանակցություններ վարելու այլ պետության տարածքների համար,-նշել  է նա։

Այն հարցին, թե կարելի՞ է ենթադրել, որ որոշակի համաձայնություն կա տարածքների վերադարձի առումով, նա նշել է, թե չի կարող ասել, որ համաձայնություն կա, բայց դա անթույլատրելի զիջողականություն է։

-Նմանատիպ գործելաոճն անթույլատրելի է, որովհետև այստեղ արդեն խոսքը ոչ թե փոխզիջումների, այլ զիջումների մասին է,-նշել է Արմեն Մարտիրոսյանը։

7or.am