«Համագործակցություն հանուն ժողովրդավարության» կենտրոնի նախագահ Ստեփան Դանիելյանը «7օր»-ին ասել է, որ իրեն քիչ է հուզում, թե կոալիցիայից ԲՀԿ-ի դուրս գալու պարագայում դրանից ով կշահի, ով կտուժի։

-Ինձ հետաքրքրում է, թե դա ինչպես կանդրադառնա Հայաստանի քաղաքական իրավիճակի վրա: Իմ տեսակետով՝ կոալիցիան Հայաստանի ժողովրդի դեմ ուղղված համաձայնագիր է, որի նպատակը իշխող ռեժիմի համար նպաստավոր «status quo»-ի պահպանումն է: Եթե ժամանակին այն կարողացավ թեկուզ իշխանության պահպանման համար որոշակի կայունություն ապահովել, ապա այժմ դա հնարավոր չէ, քանզի քաղաքական ու սոցիալական իրավիճակը երկրում փոխվել է: Նորից փորձել իշխանության համար կայունություն ապահովել նույն եղանակով՝ ոչ միայն չի հաջողվի, այլև, ճիշտ հակառակը, ավելի կնպաստի անկայունությանը: Հայաստանում ստեղծվել է մի իրավիճակ, երբ փաստորեն չկա հասարակության որևէ շերտ, որը շահագրգռված լինի իրավիճակի պահպանմամբ' անգամ պետական նոմենկլատուրան, ուժային կառույցների միջին և բարձրաստիճան ներկայացուցիչները, ես կասեի' նույնիսկ ՀՀԿ-ի նոմենկլատուրան: Կոալիցիայի փլուզումը ելքերը քաղաքական դաշտում որոնելու հնարավորություն կընձեռնի,-ասել է Ս. Դանիելյանը:

«Հայաստանում եգիպտական սցենարի կրկնությունը hնարավո՞ր է՝ հաշվի առնելով ՀՀ իշխանության քաղաքականությունը արտաքին և ներքաղաքական հարցերում»,-հետաքրքվել է «7օր»-ը։

-Եթե կոալիցիան դադարի գոյություն ունենալուց, Հայաստանում եգիպտական սցենար հնարավոր է, հակառակ դեպքում մեզ սպասվում է հայիթիական սցենար, երբ զարգացումները քաղաքական դաշտից դուրս են գալիս և ստանում են տարերային, չկառավարվող բնույթ,-պատասխանել է Ս. Դանիելյանը:

7or.am