Պատասխանելով Սերժ Սարգսյանի նախաձեռնողական քաղաքականության տապալման մասին հարցին՝ ՀՅԴ անդամ Ալվարդ Պետրոսյանն «Ազդակ» ակումբում ասել է, որ տապալվելը սարսափելի բառ է, բայց եթե անգամ ընդունենք, որ հայ-թուրքական հարաբերությունների կարգավորման գործընթացը տապալվել է, ապա կարելի է ասել, որ դա նորի սկիզբն է։

-Բացասման բացասման օրենքը գիտե՞ք։ Հանճարեղ օրենք է։ Ցանում ես ցորենը, այդ ցորենը մեռնում է, մեկ էլ գարնանը մի հատ նոր ծիլ է առաջանում։ Գուցե այդպե՞ս նայենք։ Հայ-թուրքական հարաբերությունների վրա այսօր բացասման բացասման օրենքն էր գործում։ Այսինքն, մենք եկանք, այս փուլը տապալեցինք, բայց նոր հանգրվանի հասանք,- ասել է Ա. Պետրոսյանը՝ որպես օրինակ բերելով այն, որ արդեն կարծես սովորույթ էր դարձել ապրիլի 24-ին արևածաղիկ չրթելով Ծիծեռնակաբերդ գնալը.

-Այսօր ես գիտեմ, որ ապրիլի 24-ին արդեն միայն զբոսնելու, տղա, աղջիկ արևածաղիկ չրթելով չեն գնալու։ Ուրիշ մի իմաստ մտավ։ Ուրեմն նշանակում է՝ ինչ-որ մի նոր ծիլ եղավ, ուրեմն մենք այդ փուլն ավարտեցինք, փակեցինք, նոր արթնացած համաժողովրդական զարթոնք, հայ-թուրքական հարաբերությունների վրա նոր հայացքով պետք է առաջ գնանք։ Այ սա հենց նշանակում է դանդաղ շտապել։

Նա նաև նշել է, որ Սերժ Սարգսյանի և հայ-թուրքական հարաբերությունների հարցում ահռելի փորձ կուտակած Դաշնակցության հետ ավելի լուրջ քննարկումներ կարող են լինել։

-Այստեղ քաղաքական սնափառությունների խնդիր չի, որ նախագահը ներկայացնում է Հանրապետական կուսակցությունը, մենք՝ Դաշնակցությունը։ Չպետք է ամեն մեկը փորձի ի՛նքն ուժեղ երևալ։ Կարծում եմ՝ սա տնովի լուծելու հարց է,- հայտարարել է Ա. Պետրոսյանը։

Նա նաև ավելացրել է, որ ինքը Հայաստանում Սերժ Սարգսյանի ամենահին ծանոթներից մեկն է, և կարող է ասել, որ Սերժ Սարգսյանը պատրաստակամ է շփումների համար.

-Փակ մեկը չի։ Ես առիթ եմ ունեցել հանդիպելու մի քանի ամիս առաջ, իմ կարծիքը հայտնել եմ։ Որքանո՞վ է դա իր վրա ազդել՝ չեմ կարող ձեզ ասել։ Բայց որ ինքը լսելու կարողություն ունի...ես դա շատ մեծ դրական հատկանիշ եմ համարում, որ մարդը կարողանում է նաև լսել, էն գլխից իմաստունի տեղ իրեն չի դնում։

7or.am