Կոտայքի մարզի ընդհանուր իրավասության առաջին ատյանի դատարանը հիմնավորված է համարել  2009թ. հունիսի 3-ին Կոտայքի մարզի Նոր Գյուղ համայնքի Հասոյան ընտանիքի 4 անդամներին  սպանելու համար Ալֆրեդ և Ժուլվեր Հովհաննիսյաններին նախաքննական մարմնի առաջադրած մեղադրանքները և դատապարտել ցմահ ազատազրկման:

Դատարանը հավաստի է համարել մեղադրող դատաղազների կողմից ներկայացված ապացույցները առ այն, որ Ալֆրեդ և Ժուլվեր Հովհաննիսյանները Մ. Հասոյանի տունը գնելու կեղծ պատրվակով մտել են վերջինիս տուն, որտեղ այդ պահին բացի Մ. Հասոյանից եղել են նաև նրա կինը, աղջիկը և թոռը, ապա առանձնակի դաժանությամբ՝ դանակի բազմակի հարվածներով, սպանել ընտանիքի՝ տանը գտնվող  բոլոր անդամներին:

Այսպես՝ 2009թ. մայիսի վերջին Ժ. Հովհաննիսյանը  Երևան քաղաքի Քոչար փողոցի անշարժ գույքի  շուկայում ծանոթացել է Մ. Հասոյանի հետ: Վերջինս զրույցի ժամանակ ասել է, որ Կոտայքի մարզի Նոր Գյուղի իր տանը մոտ 30 000 ԱՄՆ դոլար գումար ունի:  2009թ. հունիսի 3-ին Ժուլվեր Հովհաննիսյանն իր եղբոր՝ Ալֆրեդ Հովհաննիսյանի հետ ոգելից խմիչքի ազդեցության տակ գնացել են Նոր Գյուղ՝ նախապես իրենց հետ վերցնելով դանակ և  գործարանային արտադրության 8մմ տրամաչափի  ձայնագազային ատրճանակ և կպչուն ժապավեն՝ ձեռքերն ու ոտքերը կապելու համար:

Առանձին խոսելու նպատակով  Ժ. Հովհաննիսյանը Մ. Հասոյանի հետ դուրս է եկել բակ, անցել տան ետնամաս, որտեղ էլ դանակով բազմակի  հարվածներ է հասցրել Մ. Հասոյանի  կրծքավանդակին:

Վերջինիս սպանելուց հետո Ժ. Հովհաննիսյանը մտել է տուն, փակել տան դուռը և դանակի ու ձայնագազային   ատրճանակի գործադրման սպառնալիքով  տան մյուս անդամներից պահանջել  իրենց տալ  տանը եղած ոսկեղենն ու փողը:  Այնուհետև Հովհաննիսյան եղբայրները, դանակի բազմակի հարվածներ հասցնելով, սպանել են Մ. Հասոյանի աղջկան՝ Ն. Հասոյանին, իսկ հետո՝ կնոջից տեղեկանալով ոսկեղենի ու փողի գտնվելու վայրի մասին, սպանել են նաև նրա կնոջը և 13-ամյա թոռանը:

Այդ ամենից հետո Ժուլվեր և Ալֆրեդ Հովհաննիսյանները, վերցնելով հափշտակած առանձնապես խոշոր չափերի  հասնող 7 670 000 ՀՀ դրամ արժողությամբ  ոսկյա զարդերը, բջջային հեռախոսները և  այլ գույք,  հեռացել են:  Հաջորդ օրը  ոսկյա զարդերը Հովհաննիսյան եղբայրները  վաճառել են  Երևան քաղաքի Մ. Խորենացու փողոցի ոսկու շուկայում  և վաճառքից գոյացած 370 ԱՄՆ դոլարը գումարն  ու 220 000 ՀՀ դրամը բաժանել իրար մեջ:  Հափշտակված   ոսկյա զարդերի վաճառքից գոյացած գումարով Ա. Հովհաննիսյանը խնջույք է կազմակերպել  իր որդու՝ բանակից վերադառնալու կապակցությամբ, իսկ Ժ. Հովհաննիսյանը մարել է իր պարտքերի մի մասը:

Նախաքննության ընթացքում պարզվել է նաև, որ Ժուլվեր Հովհաննիսյանը 1992-1993թթ ընթացքում ապօրինի կերպով ձեռք է բերել  և իր տանը ապօրինի պահել   ռազմամթերք հանդիսացող գործարանային արտադրության 2 հատ  մարտական փամփուշտ, իսկ Ալֆրեդ Հովհաննիսյանը 2008թ. ապօրինի կերպով ձեռք է բերել  և իր տանը ապօրինի պահել   ռազմամթերք հանդիսացող գործարանային արտադրության 5 հատ  մարտական փամփուշտ: Նշված փամփուշտները  հայտնաբերվել են  Հովհաննիսյանների տներում կատարված խուզարկությունների ժամանակ:

Նշված հանցավոր արարքները կատարելու համար  Ժուլվեր և Ալֆրեդ Հովհաննիսյանները հանցավոր են ճանաչվել  ՀՀ քրեական օրենսգրքի  104-րդ հոդվածի 2-րդ մասի 1-ին, 5-րդ, 7-րդ, 8-րդ, 11-րդ կետերով, 175-րդ հոդվածի 3-րդ մասի 1-ին կետով, 235-րդ հոդվածի 1-ին մասով և 235-րդ հոդվածի 4-րդ մասով և դատապարտվել ցմահ ազատազրկման: